No.702/2021-2022 

Lawngtlai, Tomir thla ni 27, 2021: Vawiin khan Lawngtlai Bawrhsap Dr Andrew H. Vanlaldika hovin Lawngtlai District thuneitute leh Chawngte lama inrelbawlna, dan leh thupek kenkawhna leh hriselna kawnga mawhphurtute'n tun hnaia Chakma Autonomous District Council (CADC) huam chhunga COVID-19 hri kai an pun chhoh chungchangah hma lakna kal mek leh hma lak zel dan tur sawi hovin virtual meeting an nei.

Lawngtlai District hmunpui lam atangin Bawrhsap hovin District Administration, Health Department leh Police lam te chuan NIC Conference Hall atangin meeting hi an huaihawt a. Chawngte lam atangin CADC-a Chief Executive Member Pu Durjya Dhan Chakma bakah, Chawngte Sub-Divisional Officer (Civil) Dr Manesia Khaimeichho, Chawngte CHC-a SMO leh MO te, Chawngte SDPO leh tlawmngai pawl ai awhte chuan mahni awm hmun theuh atangin Google Meet kal tlangin meeting hi an chhim ve bawk a ni.

Chawngte SDO (C) Dr Manesia Khaimeichho chuan an hma lak dan report pein, Chawngte Sub-Division huam chhunga total lockdown leh curfew kalpui danah khauh taka kalpui a nih thu te, Village Level Task Force te pawhin theih tawp an chhuah thu te, hma lak dan tur ngaihtuahin CADC, medical, police, tlawmngai pawl leh VLTF-te nen meeting neih thin a nih thu te a sawi a. Police lam paw'n a theih chin chinah tha taka patrolling an kalpui thu leh medical team pawhin theih tawp chhuaha contact tracing, test leh positive enkawl lam te an thawh thu ngaihthlak a ni bawk.

CADC huam chhunga COVID-19 hri leng kaihhnawiha hma laknaah CADC lam atangin thlawpna leh thawhpuina tha tak a awm thu ngaihthlak niin, sub-division level-a hma lakna kawng hrang hrangah thawktu indaih lohna chu harsatna lian tak a nih thu ngaihthlak a ni a. Thawktu leh hmanraw indaih lohna phuhru tura hma lak dan tur sawi ho nghal a ni.

Bawrhsap chuan hri leng inkai chhawnna chhu chat turin khauh zawka mipui khuahkhirhna kalpui a tul thu leh VLTF leh CYCA te chhawr tangkai a, mipuiah a tam thei ang ber zirtirna puanzar a tul thu te sawiin, Chawngte Sub-Division huam chhunga COVID-19 dona kawnga mawhphurtu leh hma latute chu thahnem ngai leh zuala thawk turin a fuih thar a ni.

Chawngte area-a COVID-19 positive an pun zel avangin Community Covid Care Centre (4C) ruahman belh bakah, inkhuahkhirhna leh Covid Appropriate Behaviour te mipuiin tha zawka an zawm theih nan Executive Duty din te rel a ni a. Chawngte huam chhunga hma laknate a hmuna enpui turin Lawngtlai Additional DC Pi Marilyn Rualzakhumthangi leh Senior Medical Officer Dr S. Thaizi te chuan May ni 29, 2021 (Inrinni) hian Chawngte an tlawh dawn bawk a ni.

Chawngte lam atanga Medical Team report atanga a lan danin, tun dinhmunah Chawngte (CADC) huam chhungah hian COVID-19 positive enkawl lai mi 137 (mipa 75 leh hmeichhia 62) an awm mek a ni.