Vawiin khan Lawngtlai East Assembly biala MLA Model Village hawnna inkhawm, Model Village atan thlan Lungtian khuaah neih a ni a, Minister of State for AH&Vety  Pu C. Ngunlianchunga’n a hawng.

Minister chuan Lungtian khua chu khaw vannei tak an nih thu leh Laifate khawhlun hmasa a nih avangin Model Village nih pawh phu hle a a hriat thu a sawi a, chutih rual chuan Model Village nihna chuan mawhphurhna tam tak a kengtel a ni tih hriat  a tul a ni a ti. Thianghlimna kawngah te, sawrkar thawhpui kawngah te, eizawnna kawngah te leh thil dang dangah mitin in tihtur kan nei theuh a ni tih kan hriat a pawimawh hle a ni, Lungtian khua atang hian thiltha tam tak a lo chhuak tawh a, a aia tam zawk hring chhuak zel turin hmabak a la nei a ni a ti bawk. Minister hian Model Village lawmna lungphun a hawng nghal bawk.

Lawngtlai East bialtu leh Model Village atana thlang tu, Pu H. Zothangliana, Parliamentary Secretary pawh in thu sawiin a bial chhunga Lungtian khua Model Village atana a thlan chhan te a tarlang a, Lungtian khua chu theihna tam tak awmna, hmasawn tura mipuite inlungrualna khua ni a a hriat thu a tarlang. Hriselna kawngah te, eizawnna kawngah te, zirna kawngah te, hmasawn na atana thwhhona kawngah te nasa zawk a ke pen turin a chah bawk. Model Village a nih ang ngeiin hmasawnna hna pawh a theih ang anga thawh zel a nih tur thu sawiin sawrkar nena tha taka thawkho thin turin khaw mipuite chu a ngen a ni.

Model Village hawnna inkhawm ah hian Lawngtlai Bawrhsap Pu J. Hmingthanmawia pawh in thu sawiin sawrkar hmalakna hna hrang hrangah chak taka thawh zel a nih tur thu a sawi a. Ram in hma a sawn theih na tura sawrkar porgramme hrang hrang kalmek atanga tanpuina dawngtute pawhin dik taka hman theuh tum turin a chah bawk. Lungtian khaw mipuite chu Model Village lawmpuina a hlan a ni.

Model Village hawnna inkhawm pual hian Health Department leh AH&Vety Department ten free clinic an buatsaih a, Health Department Clinic ah hian mi 216 inentirin, Animal clinic lamah ran damlo 1756 en a ni bawk.

Lungtian khua hi Phawngpui tlang pang-a awm niin chhungkaw 330 vel chhenna khua a ni a, mihring 1800 vel awmin Village Council pahnih an nei a ni.

Model Village lawmna inkhawm hi Council hnuaia bialtu MDC Pu F. Hranglura'n a kaihruai a khawtlangin ruai nen ropui taka lawm a ni.