No.555/2020-2021

Lawngtlai, Tau thla ni 23, 2020: Vawiin khan Lawngtlai East bialtu MLA, Agriculture Development Board Vice Chairman ni bawk Pu H. Biakzaua chuan Covid 19 dona kawnga District Hospital Lawngtlai inbuatsaihna enpuiin, tanpuina a hlan.

Pu H. Biakzaua chuan COVID-19 do nan leh hri kai an awm palha enkawl tura District Hospital Lawngtlai inbuatsaihna chu District mipuite tan a thlamuanthlak hle a ni, a ti a. Lawngtlai District thenawm ram leh state thenawmah te hri vei hmuh belh zel a nih avangin damdawi in leh mipui hriselna atana thawkte chu inthlahdul lova tan mar pat a ngai a ni, a ti.

District Hospital Lawngtlaiah hian COVID-19 kai an awm palha a hranga enkawlna tur khum panga awmna buatsaih fel a ni tawh a, damlo enkawl nana mamawh khawl pawimawh leh a enkawltute mamawh tur pawh chhawp fel vek tawh a ni.

Lawngtlai East bialtu MLA hian District Medical Superintendent Dr Zothanpari Chhakchhuak hnenah damlo kanna leh Poor Fund-a hman tur pawisa fai a hlan a. Lai Autonomous District Council (LADC) Chief Executive Member Relief Fund-ah Rs 10,000/- (sing khat) chhung lutin, Lawngtlai District MJA te hnenah hmai tuamna leh kutkawr a hlan bawk.