221/2022-2023

Ṭau thla ni 21, 2022: Lawngtlai East Bialtu MLA, Agriculture Development Board Vice Chairman Pu H. Biakzaua chuan April 5 - 9, 2022 chhunga Hnahthiala khelh, 18th Mizoram Volleyball Association (MVA) Inter-District Volleyball Championship-a mipa team champion, District Volleyball Association, Lawngtlai (DVAL) mipa team chu vawiin khan Lawngtlai Electric Venga ama chenna inah lawmpuina thingpui inpuiin, lawmpuina thilpek a hlan.

Pu H. Biakzaua chuan DVAL mipa team-in Mizoram pum huap volleyball inelnaa thiam ber nihna an hawn thei chu lawmawm a tih thu sawiin, Champion Nomawi an hawn thei chu player-te leh DVAL hruaitute thawh rimna leh taimakna rah a nih thu a sawi. Hruaitute leh player-te chu Inter-District Champion nihnaah duh tawk mai lo va, state leh ram tan pawha fehchhuak thei tura inbuatsaih sauh sauh turin a chah a. Mipa team champion lawmpui nan ₹ 50,000/- a hlan nghal a ni.

He hunah hian DVAL President Pu V. Lalthantluanga chuan tun tuma mipa volleyball team te champion theih nana sum leh pai, tha leh zung senga ṭanpuitu zawng zawng chungah lawm thu sawiin, champion tura an zinkawng report a pe bawk.

April ni 4, 2022 aṭanga khelh ṭan, 18th MVA Inter-District Volleyball Championship, 2022 hi Hnahthialah khelh niin, DVA Lawngtlai mipa team hian group stage-ah Saitual, Hnahthial, Lunglei leh Kolasib an hneh a. Semi final-ah Mamit hneh lehin, final-ah Kolasib chu 3-2-a hnehin team champion an ni ta a ni.

Attachment

  • Loading attachment...