220/2022-2023
Dated Serchhip, the 21st April, 2022: Vawiin khan Pu Lalchamliana, Hon'ble Home Minister, Hrangturzo bialtu MLA ni bawk chuan Sailulak khuaa BADP sum hmanga sak Community Centre a hawng.

Building thar lawmna inkhawmah Pu Lalchamliana chuan, Sailulak Community Centre hawn theiha peih a ni ta leh a hawng tura amah an sawm chu lawmawm a tih thu a sawi a. Hrangturzo bial chhungah rural development sumte, Rurban sumte leh sawrkar hmalakna dangte hmanga hmasawnna hnathawh tam tak awm chho zel hi ka lawm hle a ni, a ti. Tiau lui panna kawng hi MLA a tlin tirh ata a rilrua awm nghal a nih thu tarlangin, a rin aia kawng hi a lo thui tham deuh si avangin hmalakna lian tham zawk a mamawh a, han nawr tlang nghal mai a har rih deuh a ni, a ti a. Community Centre chhung bungrua tihchangtlun zelna pawh BDO hova lo dap zui turin a chah bawk. A bial chhung inkalpawhna kawngte a tha tlang tawh hle chu lawmawm a tih thu tarlangin, tuna siam ngai la awm chhun Artahkawn leh Chekawn inkar kawng pawh hi lo thawh tan mai phalna sawrkarah dil mek a ni a, hun reilotea kan tan theih kan beisei a ni, a ti bawk. Biate Water Supply Scheme chu naktukah hawn a ni dawn ta a, N. Mualcheng chu NABARD sum hmangin an tuilakna tur Rs. 880 lakh sanction a ni tawh a, N. Vanlaiphai tuilak hna thawhna tur pawh hmuh tawh niin, khaw dangte pawh Jal Jeevan Missions hmalakna hmanga Functional Tap Water neihtir vek tuma hnathawh mek a ni, tiin a bial chhunga hmasawnna hnathawh mek langsar zualte a tarlang a ni.

Inkhawm hi Pu H. Lalhruaitluanga, MCS, BDO, E. Lungdarin a kaihruai a. Pi F. Lalhmingmawii, Technical Assistant chuan technical report a pe a ni. He Building hnuai ber hi BADP sum Rs. 11 lac senga sak a nih hnuin, a zawm lehna tur sum hi BADP 2019-20 atangin Rs. 50 lac hmuh leh niin he pawisa hmang hian a chunglamah chhawng thum zawm belh a ni ta a ni. A sak hna hi 18.2.21 ah tan niin 16.5.21 ah sak zawh a ni a, khawtlangin he in thar hi thil tangkai hrang hrang atan hmangin, a chung ber bik hi mikhual thlen nana hman an rel a ni.