Vawiin kha Mizo Hmeichhe Insuihkhawm Pawl (MHIP) din champha vawi 43-na "MHIP Day" a ni a. Lawngtlai Electric Veng Branch MHIP chuan PWD Rest House-ah he ni hi an hmang a. Lawngtlai DIPRO Pu C.Lalhruaitluanga MIS chuan a hmanpui.

He Day hmanna chawhma hun hi Branch MHIP Secretary Pi J.Lalremruati'n kaihruaiin, Branch MHIP chanchin leh hma lak dan tlangpui a tarlang nghal a. ECM Pi F.Liannguri'n hunserh hmangin, Branch MHIP zaipawlin hawnna hla an sa a. Pu C.Lalhruaitluanga chuan hmeichhiate pawimawhna leh Pathianin a siam ropuizia sawiin, MHIP member kal khawmte chu chhungkua, ram leh khawtlang tana an hna thawh tha chu chhunzawm zel turin a chah a. Electric Veng VCP Pu K.Laldinmawia, Branch MHIP President Pi Nichiangi leh Electric Veng Branch LWA President Pi Lalngaii Khiangte te pawhin thu an sawi.

Chawhnu hun chu Pi Zodinpuii Fanchun-in a kaihruai a. Nehru Yuva Kendra (NYK) Lawngtlai leh Branch MHIP tang kawpin an buatsaih skill upgradation training programme hnuaia Bawihpuii Beauty Concept atanga beauty culture zir chhuak mi 15 te hnenah certificate hlan nghal niin, intihhlimna chi hrang hrang nen hun hlimawm tak hman zui a ni a. Branch MHIP Vice President Pi Kaplianchhingi'n lawm thu a sawi hnuin, hun khar a ni. Vawiin MHIP Day pual hian Electric Veng Branch MHIP te chuan Christian Hospital Lawngtlai poor patient fund atan Rs 5000/- (sangnga) an hlan nghal bawk.

Lawngtlai Electric Veng Branch MHIP hi July ni 18, 1996-ah din niin, khawtlang tana theih tawp chhuaha hna a thawh bakah, a bik takin hmeichhia leh naupangte himna leh hmasawn nan hma an la thin a. Tun dinhmunah hian member 252 an awm mek a ni.