Vawiin tlai khan Information & Public Relations Department changtu leh bialtu MLA ni bawk Pu Lal Thanzara chuan Zarkawt Branch Mizo Hmeichhe Insuihkhawm Pawl (MHIP) tena MHIP Day lawmna hun Recreation Centre, Zarkawta an buatsaih chu Khuallian niin a hmanpui.

Pu Lal Thanzara chuan Mizo te chu chanchinthain a kentel tum thuhmun nei tlawmngai pawl hrang hrang, mite tana malsawmna nih tum theuh kan nei hi kan vannei hle ani a ti a. Inchhung khur hlimna leh lawmna tam tak hi hmeichhiate ah a innghah thu tarlangin kan thalaite tichhe mektu ruihhlo dona kawngah pawh an pawimawh em em ani, a ti a. Zarkawt Branch MHIP hmalakna leh hnathawh te chu fakawm a tih thu sawiin mite tanpui tura inhuam reng pawl kan nei hi a lawmawm hle ani, a ti a. MHIP hmalakna hrang hrang heng; ruihhlo do,hmeichhia leh naupang te himna kawnga hnathawh leh chhumchhia zawkte puihte chu ringtute tih dan tur dik tak ani a ti a. I&PR Minister chuan sawrkar pawhin hmeichhia te dinhmun chawisan kawngah nasa takin hma a lak thu sawiin an tan heng; Village Council, Local Council leh Aizawl Municipal Corporation-ah te Seat dah sak anih thute, hmeichhiate rokhawm ve theihna dan ‘The Mizo Marriage, Divorce and Inheritence of Property Act, 2014’ siam ani tawh bawk ani a ti a. Minister chuan veng chhung tlawmngai pawl dangte nena MHIP te thawh hona tha tak chu chhawm nung zel turin kalkhawm MHIP member te chu a sawm nghal bawk a ni.

Zarkawt MHIP President Pi Tlangthanmawii pawhin thu sawiin MHIP te chu kan eizawnna leh Kohhhran lama chhuahvah te anih lem loh chuan hun tam zawk In-ah pasal fanau te uapna atan kan hmang thin tur ani a ti a. Chhungkawnu a hlim chuan chhungkua a hlim thin ani a ti a. MHIP chu ramri neilo rawngbawlna anih thu sawiin chhungkua leh khawtlanga lungrualna leh hlimna thlen tu nih kan tum theuh tur ani a ti bawk.

MHIP Day 2017 pual hian Zarkawt Branch te hian luanchhuahna Programme neiin Gan Sabra, Zonuam-ah cheng 5000 an hlan a. Vawiin chawhnu dar 2 atang khan infiamna leh intihhlimna hun an lo hmang tawh bawk a ni.

Zarkawt Branch MHIP Day 2017 lawmna hun hi Pi Lalngilneii, Financial Secretary in a kaihruai a. Pi Zokhumi Vankung, Adviser in hunserh a hmang a. He lawman hunah hian Member thenkhat te lawman hlanna leh Zai hona te neih niin MHIP Day ruai an theh nghal a ni.