Nimin chawhnu dar 2:00 PM khan CYLA Hall, Lawngtlai -III ah Lawngtlai khaw chhunga zirtirtute ko khawmin Education Minister Pu Lalsawta’n Mizoram zirna siamthat a tum dan te a sawi a. He hun hi Pu C. Ngunlianchunga, CEM, LADC in a hmanpui bakah LADC leh Minister zuitu Mizoram Education Department Officer ten an hmanpui a, Pu V. Zirsanga, EM i/c Education, LADC in a kaihruai a ni.

Pu Lalsawta chuan India ram hmun tamtakah Isua pian hmaa zirna in lian an nei tawh chungin bul tan tlai tak Mizoram hian hma a sawn chak hle a, Zirna lamah ngat chuan India rama state dangte chhoh en kan ni mek a ti a. Mizorama Kohhranten zirna an ngai pawimawh chu zirna hmasawnna chhan pakhat  ni a ti. Pu Lalsawta chuan zirtirtute pawimawhna sawiin hnam anga min dinchhuah tirtute an ni a ti a; Mizorama zirna siamthatna kawnga sorkar hmalakna hrang hrangte sawi langin ‘Zirna lama kan thiltum hi kan hre chiang a ni’ a ti. Mizote hi zirna lamah khawvela sang ber kan ni thei tih sawiin mite mamawh thiamna neih a tul a ti bawk. Zirna hi pawn lam atanga siamthat tur ni lovin a chhung atanga siamthatu nih tum turin kalkhawmte chu a fuih a, zirtirtuten mahni fate kalna tlaka an sikul an siamthat a ngai tih a sawi bawk.

Pu C. Ngunlianchunga pawhin thu sawiin ‘Zirtirtu’ tia hriat tlak nih a tulzia a sawi a; zirtirtu heti zat kalkhawm hian ram hi kan siam tha thei a ni a ti bawk. Pu Chunga hian dikna, rinawmna leh thianghlimna nena zirtirtute hmalakna hian ram a chawimawi thin  ni a ti bawk.

He inkhawmah hian Lawngtlai khaw chhunga Primary School atanga College thlengin zirtirtute an kal tha hle a. Pu Lalsawta hian heng sikul rawn kal zawng zawngte hi volleball leh net a pe vek a ni.

Attachment

  • Loading attachment...