Vawiin hian National Highway 54, Lawngtlai khawpui chhunga kaltlang chin zauh hna thawh mek chu District Level Monitoring Committee te chuan a hmunah kalin an enfiah a, Pu Lallawmawma, SDO Sadaar chuan a ho a ni.

Pu Lallawmawma chuan, khaw chhunga NH 54 zauh hna hi tunah Central YLA Hall atanga Chawngtepeng (Chandmary Square) inkar thleng thawh mek a ni a, ruahte rawn tla tawh mahse hna hi a kal laklawh avangin a rang thei ang bera thawh zawh tum a nih tur thu a sawi a. Chawngtepeng leh 71 RCC Camp inkar zauh hna erawh chu Monitoring Committee in a thlir hmasak zet hnuah thawh chhunzawm tur a nih leh nihloh a chiang thei chauh ang, a ti. Pu Lallawmawma chuan, kawng zauh a nih avanga tui pipe phawrh sakte, step tihchhiat sak takte engemawzat a awm a, chung thilah te mipuite inhawng taka an awm thin chu lawmawm a tih thu a sawi a ni.

Hnathawh mek enkawltu Pu Lalrinngheta, EE, Highway Lawngtlai chuan, khawchhung kawng zauh hnathawh mekah mipuiten harsatna an siam loh thu sawiin mipuite inhawn avanga chak taka thawk thei an nih thu a sawi a, kawngpui paltlang VC leh YLA ten an tawiawm that avangin lawmthu a sawi a ni.

Sawi tawh thin angin National Highway 54, Lunglei to Tuipang hi tunah siamthat hna thawh mek a ni a, Lunglei atanga Lawngtlai khaw chhung Central YLA Hall thleng hi Lunglei EE hnuaia thawh niin GP Project kutah hna pek a ni a, Central YLA Hall atanga Tuipang inkar hi RDS Company kutah pek niin an ni hian Lawngtlai khawchhung bakah Zero khua atanga Tuipang inkar thawkin an bei mek a ni.