Nimin khan bialtu MLA Pu R. Lalrinawma, Dy. Speaker bultuma Sihphir Youth Club ten an buatsaih Aizawl East-I Cup 2016 Football Tournament, Sihphir Venghlun Play Ground-a neih chu tluang taka zawh niin kharna Programme a hmanpui a, Mizoram Youth Club Zaipawl 3 “Ram hi kan siam” tih Pu. V. Thangzama phuah Music Video chu a tlangzarh nghal bawk a ni.

Khuallian Pu. Lalrinawma chuan thu sawiin football tournament hlawhtling tak buatsaih a nih chu lawmawm tiin thalai te tan infiamna hi tihtakzet a kan beih chuan eizawnna tlak a nih thu a sawi a. Sorkar in thalaite khawvel infiamna a ngaipawimawh hle tih sawiin thawkrim tur leh thuawihna leh insumtheihna nei turin infiammite leh kalkhawmte a chah a ni.

Aizawl East-I Cup hi April 26, 2016 khan tan niin team 19 an tel a; final hi Sihphir Venghlun FC leh L.R & L.R Memorial FC Sihphir te’n khelin Sihphir Venghlun FC hi 2-1 in an chak a ni. Champion hian trophy leh medal bakah Rs. 20,000/- an dawng a, Runners up hian trophy leh medal bakah Rs 10,000/- an dawng bawk a ni. Mimal lawmman 4 (pali) sem niin, semi final lut te’n Rs 1000/- theuh an dawng bawk a, He tournament chhung hian goal 83 a lut a ni.

Tournament kharna hi Youth Club member Cicilia Lalrinngheti’n a kaihruai a, Music Video tlangzarhna programme hi Pu Khamliana, Youth Club Founder President, National Communal Harmony Awardee in a kaihruai thung. Technical report hi Lalnunsanga, Sihphir Youth Club Secretary in a pe bawk a ni.

He programme-ah hian Aizawl Municipal Corporation (AMC) Ward-7 Councillor Pi K. Lalhmingliani leh Block hruaitu thahnemtak in khuallian Pu R. Lalrinawma hi an tawiawm a, Zaithiam lar tak takte leh Youth Club Member thahnem tak he hmunah hian an tel bawk a ni.