AH&Veterinary Department chuan headquarter atangin Champhai District chhunga vawk natna leng chu zirchiang a hmalak dan tur te ngaihtuah tura Rapid Response Team for Disease Outbreak a tirh te chuan nimin chawhnu khan Champhai lo thlengin, Champhai DC an hmu nghal.

DC Pu Vanlalngaihsaka ho hian DC Conference Hall-ah Sub-Hqrs hruaitute nen Rapid Response Team-te hian inkawmna hun an nei nghal a. DC chuan vawk lakluh leh thawnchhuah khuahkhirh anih tur thu sawiin, dan zawmlo te chu an chungthu ngaihtuah anih tur thu te an sawi a ni.

Vawk natna hi a darhzau belh loh nan mitin kan fimkhur a tulzia sawilan niin, natna vanga vawk thi chu a ruang leihnuai a phum ngei ngei tur anih thu sawi a ni a. Sawngbawl dan tur dik tak nilova dai ah te paih mai mai chuan a ruang lo ei tu ramsa ten natna hi an pu darh zel thei a ni, an ti a. Phumna tur hmun nei mumal lo te tan Sub-Hqrs YMA ten hmun an siam sak chu lawmawm an tih thu Rapid Response Team chuan an sawi bawk.

Vety officer-te chuan vawk natna hi virus in a thlen niin, taksa a natna dotu immune system a tihchhiat vangin natna hrang hrangin a tlakbuak phah thin thu an sawi a. Natna hi ran dang leh mihring pawh pudarhtu kan nih avangin kan fimkhur tlan vek a pawimawh thu sawiin, mihring hriselna tan erawh a hlauhawm loh thu Vety Officer-te hian an sawi a ni.

Champhai a Rapid Response Team kalte chu Dr. Hmarkunga, Jt. Director, Dr. Esther Lalzoliani, Vety Officer (Disease Investigation) leh Dr. Jimmy Rosangzela-te an ni a. Vawiin (4.4.2016) hian Champhai leh a chhehvelah sample la in an kal dawn bakah ruang thenkhat an post-mortem dawn a ni.