Nimin chawhnu lam khan PWD Multi Modal Project S.E. Er. Malsawmdawngliana chuan Chawnhu a a pisa ah Lawngtlai  Khawpui chhunga National Highway in a paltlang veng hrang hrang hruaitute leh tlawmngai pawlte a kawm a, kumin March thla chhung ngeia khawpui chhung kawng siam zawh a nih tur thu hrilhin chumi atana sum mamawh pawh Highway Ordinary Repair Fund atanga cheng 27.10 lakh hmuh a nih thu leh 20 lakh phei hi chu dawn fel tawh a nih thu a tarlang bawk.

Tarlan tawh angin All Vehicles Owners and Drivers Association ten Lawngtlai khawpui chhung leh a panna kawng chhe lutuk siam that phut a March 5 atanga Total Bandh neih an tum lai leh February 18-20 chhung a Young Lai Association Genereal Conference Vathuampui a neih ah kawngpui siamtha thuai tur a sorkar ngen nise tia rorel a nih mek lai in, nimin chawhnu lam khan Er.Malsawmdawngliana SE, PWD (Multi Modal) chuan Chawnhu a a Office ah; National Highway in a paltlang Lawngtlai khawpui chhung a Veng hrang hrang a YLA leh VC te leh Motor neitu inzawmkhawm pawl te Meeting a neih pui a, hetah hian SE chuan khawpui chhung kawng chhia chu siamthat a nih thuai theih nan hmalakna kalpui a nih dan a hrilhfiah hlawm.

Contractor atana thlan Bengal Prakalpa Pvt.Ltd.Kolkota ten hna an thawh hleihtheih loh vanga harsatna tam tak tawh a nih dante sawifiahin Contract Agreement pawh Ni 18 khan Cancelled a nih tak thu leh Feb.26,2014 ah Contractor hna thawh tawh chinte pawh tehfel a nih tur thu sawiin Contractor lak ah hian Department lam chuan FIR an thehlut tawh niin a sawi bawk.

Hetianga thil a kal tak avang hian Lunglei-Lawngtlai-Zero Point kawngpui siam hna chu ruahmanna anga kumin fur ruahtui tlak hmaa thawh hman a nih dawn ta lova, mahse PWD Minister chuan Lawngtlai mipuite ngenna ngai pawimawhin Lawngtlai khawpui chhung bik AOC leh Chawngte Peng inkar kawng khuar hnawhpin hna Ordinary Repair Fund atangin min ruahman sak ta a, hna pawh Feb.10, 2014 atanga a thawh tan tawh niin tunah hian thawh mek zel a ni a, March thla chhung ngeia zawh fel hman tum a ni a ti.

Hetihlai hian mipuiten a then a zar chauh siam lova a vaia siam vek an phut erawh chu tun dinhmunah sum harsatna avangin a tih mai theih dawn lova, chutih rualin kawng chhuat chhe zualpui lai heng Bazar atanga Chanmari pan pheina lai ang chi ho hi chu a vaia siam tur a nih thu a sawi nghal bawk.