Vawiin hian Parliamentary Secretary Pu H. Zothangliana chuan a bial 38-Lawngtlai East chhunga khaw pahnih Archhuang leh Tialdawngilungte a tlawh a. Ti hian February thla chhungin a bial chhunga khaw awm zawng zawngte tlawh chhuakin lawmthu a sawi pahin hmasawnna tura hmalakna tur hrang hrangte a en nghal a ni.

Nimin lama Sangau leh a chhehvel khuate a tlawhnaah ah Parliamentary Secretary chuan Sangau atanga Cheu lui kawng NLUP sum senga laih a tlawh a, tin Rural Development atanga sak Community Hall te leh sawrkar hmun thenkhat te a lo tlawh tawh a. Khaw hrang hrang a fan kualna ah Pu Zothangliana chuan mipuite hnenah lawmthu sawi pahin sawrkar thar hnuaia hmalakna tur hrang hrangte a hrilhfiah hlawm a.

Khawtinah NLUP Monitoring Committee din a nih tur thu leh NLUP dawngtuten hna an thawh dan enfiah zel a nih tur thu sawiin NLUP chu tha zawka kalpui kan tum a ni a ti. Mipuite pawhin NLUP a hlawhtlin theihnan hian mawhphurhna tam tak kan nei a ni tih hre thar leh theuh turin a chah bawk.

Lawngtlai khawpuiah MPSC Exam Centre hawn thar a nih tawh avangin thlaite chu zirna lamah nasa zawka tan la tura fuihin Mizoram chhung mai nilo, India leh khawvel huap pawha mithiam nih tum turin thalaite a chah bawk. Zirna lamah chak taka hma kan sawn theihnan sawrkar pawhin a tih tur apiang a ti zel ang tiin a bial chhung mipuite chu a chah bawk.

Parliamentary Secretary hian zanin hian Vawmbuk-ah riakin khawtlang hruaitute leh mipuite a kawm anga naktukah Lawngtlai-ah riak ve thungin Aizawl lam a pan tawh dawn nia thu dawn a ni.