Vawiin chawhnu khan Assembly House Annexe Conference Hall ah 14th Finance Commission(14th FC) chuan Local body hotute, Political Party hruaitu te, sumdawng pawl hruaitute leh NGO pawl hrang hrang hruaitute a kawm a. Inkawmna hun hi Chief Secretary Pi L.Tochhong leh Finance Commissioner Pi L.N. Tochhawng ten an kaihruai a ni.

February 26 leh 27 a Mizoram sum mamawh rawn endik leh zirchiang tura lokal 14th FC mipawimawh te chu Dr.Y.V.Reddy, Chairman,Pi.Sushama Nath, Member, Dr.m.Govinda Rao, Member, Dr. Sudipto Mundle, Member, Pu A.N. Jha, Secretary,  Pu V.S. Senthil, Joint secretary, Pu Pinaki Chakraborty, Economic adviser, Pu Sanjay Prasad, director, Pu Deepak Narain, OSD to Chairman, Pu Harish Pokhriyal,  Deputy Director, Pu Raj Kumar, Asst.Director, Pu J.K.Ahuja, Consultant, Pu Balbir Singh, Consultant leh an hnuaia thawk te an ni a. An member pakhat Prof. Abhijit Sen erawh a rawn tel ve thei lo a ni.

Chief Secretary leh Finance Commissioner ten State aiawh a an lo dawnsawn hnuah 14th FC hotute chuan  Local Body - Sinlung Hills Development Council, Aizawl city Local  Council associations, Mara Autonomous District Council, Chakma Autonomous District Council, Lai Autonomous District Council leh Aizawl Municipal Council hotute chawhnu dar 4:30 leh 5:20 inkarah an kawm hmasa ber a. Hemi hnu hian dar 5:20 leh 6:10 inkarah ah Political Party hrang hrang hruaitute an kawm leh hnu in Sumdawng pawl hrang hrang hruaitute leh NGO pawl hrang hrang hruaitute kawmna hun an nei leh nghal a ni.

Inkawmna hunah hi Pu A.N. Jha, 14th FC Secretary in a kaihruai a, Mizoram aiawh a Local Body hotute, NGO hruaitute, Political party hruaitute leh sumdawng pawl hruaitute zinga pakhat theuh chu Mizoram Finance Department buatsaih,  Term of Reference' huam chinah thu pawimawh sawina hun pek a ni a. Heng pawl pawl hrang hrang te memorandum te pawh Finance Commission hnenah hian theh luh a nih bak ah a pawimawh zual dang awm thei te pawh supplimentary memorandum hmanga an theh luh chuan lo ngaihtuah a zirchiang turin FC chu a in hawn thu Chairman Dr.Y.V. Reddy chuan a sawi a ni. Meeting-ah hian  FC memberte hriat chian loh lai te leh fiahlo lai te sawi fiah na hun  hman a ni bawk a ni.

14th FC te hnenah hian Mizoram aiawh a kawmtu pawl hrang hrang hruaitu te chuan Mizoram special category state a nihna te, Infrastructure lian tham Revenue siam thei mamawhna chungchang te, inkalpawhna kawnga tih hmasawn Mizoram in a mamawh thu te, shareable budget a Mizoram chan 1% pawh tling lo chu  1% tal a nih theihna tura ngenna te, Mizoram a leilung hauhsakna awm lak chhuahhna thawh meka Mizoram hamthatna tur te, Mizorama district thar siam belh a tulna leh sum mamawh belh chungchangte, Mizoram chhim lama airport thar mamawhna te, Mizoram leiba Public Debt vanga harsatna a puih tur te in leh Mizoram mamawh zual lian tham chi hrang hrang te lungrual takin 14th FC hnenah ngenna an siam a . Local Bodies a hotute pawn development atana an mamawh hrang hrang te leh an harsatna te an thlen bawk a ni.

Vawiin Finance meeting pawimawh ah hian Local bodies hotute te bakah Political party hrang hrang aiawh te, Mizoram Merchant Association, NTUM, CYMA,MHIP, FMGE&W, Hnam Chhantu Pawl, INTACT, mizoram Chapter leh FLAM hruaitu ten 14th FC Chairman leh member techu Mizoram tana sum chungchanga thu pawimawh tak tak an sawipui a ni.

Attachment

  • Loading attachment...