Nimin khan Mizoram Journalists' Association, Lawngtlai District hruaitute chuan Lawngtlai District Hospital tlawhin, damdawi in dinhmun tlangpui an en.
MJA Member-te hi District Medical Superintendent Dr Lalmalsawmi Hmar leh thawktu dangte'n lo dawngsawngin, District Hospital-in damlo enkawlna hmanrua a neih te, damlo dahna ward te, Kayakalp Award dawng tura inbuatsaihna kal mek leh thawktute chenna tur sak mek te an en ho.
Lawngtlai District Hospital-ah hian tun dinhmunah Medical Superintendent chhiar tel lohvin, doctor sawm an awm mek a. He'ng zinga pathum chu hmeichhe lam, hnimhlum leh medicine specialist te an ni a; medical officer paruk awmin, ha lam doctor pakhat a awm bawk. District Hospital bikah hian nurse (regular) paruk leh contract-a rawih pathum, an vaiin pakua an awm mek a. Damdawi in an tlawh zawh hnua MJA Lawngtlai District hruaitute thu khawm chuan, nurse indaih lohna a nasa hlea an hriat thu leh sawrkar lam pawhin he harsatna sut kian tum hian hma a la mek nia an hriat thu te, sawrkar chuan nurse a dah belh thuai an beisei thu te an sawi.
District Hospital tlawhtu MJA member-te hian NEDP atanga Endoscope leh Ultrasound khawl state sawrkarin a lei te, damdawi in hmanrua ur thianghlimna khawl thar bakah, khawl dang an neih te an en bawk a. NEDP atanga cheng nuai 32 senga lei Endoscope khawl chu mi thiamte'n an bun fel huna hman mai theih turin pindan bik siam saah dah a ni a. Ultrasound khawl thar cheng nuai 16 chuang man chu damlote tan tangkai taka hman mek a ni bawk.
Tunlai hian India rama damdawi in tha thlanna Kayakalp Award dawn ngei tumin Lawngtlai District Hospital chuan hma a la mek a. State sawrkar department te, LADC leh Central YLA bakah, Branch YLA te, tlawmngai pawl hrang hrangte'n theih tawp an chhuahpui chu lawmawm an tih thu Medical Superintendent Dr Lalmalsawmi Hmar chuan chanchinbumite chu a lo hrilh a ni.
