Vawiin chawhma khan Lunglei UD&PA Office, Chanmari-ah Lunglei City Mission Management Unit (CMMU), UD&PA Lunglei Office huaihawt ‘Poverty Free India 2022’ NULM Rally neih a ni. He rally-ah hian UD&PA official-te leh NULM kaltlanga tanpuina dawng Self-Help Group member thahnem tak an tel.
NULM Rally kaihruaitu Pu Andrew Lalhruaia, DUDO, Lunglei chuan thusawiin New India Movement 2017-2022 kalkhawmte hnehah a hrilfiah a, kum 2022-ah India rama mirethei an awm tawh loh nan leh India ram hmel thar siam turin he movement-hi Sawrkar Laipuiin a buatsaih a ni, a ti.
He rally-ah hian kalkhawmte chuan New India Movement thutiam (pledge) an sawiho a. India ram chu ram fai tak, retheihna awm tawh lohna, eirukna awm tawh lohna, hel pawl awm tawh lohna, chi bing inthliarna awm tawh lohna, hnam bil inthliarna awm tawh lohna leh ram nuam tak leh ropui taka siam anih theih nan kalkhawm ten thu intiamna neiin rally an nei nghal bawk a ni.
NULM hnuaiah Lunglei UD&PA Department chuan hmalakna hrang hrang kalpui mekin Lunglei khawpui chhungah Self Help Group 108 din ani tawh a, heng SHG-te hi Area Level Federation 4 ten an khaikhawmin tun dinhmunah Lunglei khawpui chhungah SHG City Level Federation din tura hmalak mek niin kumin kum tawpah he Federation-hi din hman turin ruahmanna siam mek a ni a. Thiam thil lama eizawnna tlak tura inzirtirna Skill Development pawh chak taka kalpui niin kumin sawrkar kum chhungin zirlai 900 ten training an nei dawn a. Shelter for Urban Homeless (SUH) ‘Chanhaite Run’ mi 50 awm theihna tur Lunglei, Chanmari-ah sak mek anih bakah Support to Urban Street Vendor (SUSV) hnuaiah khawpui chhunga kawngkama thil zuarte hnenah license pek niin an thutna tur Vending Zone mumal taka ruahman a ni bawk.
NULM-hi Ministry of Housing and Urban Poverty Alleviation hnuaia Sawrkar Laipui Flagship Programme pawimawh tak pakhat a ni a. He Mission-in a tum ber chu a bulthuta mirethei te inzawmkhawm pawl (Self-Help Group) chak leh ngelnghet tak din a, chumi kaltlanga kawpuia retheihna tih tlem a, mirethei chhungkuate tana eizawnna tur hlawkzawk hmuhpuia, eizawnna ngelnghet an neih theihna tura kawng kawhhmuh hi a ni.
