No.2837/2020-2020

Lawngtlai, Vawkhniahzawn thla ni 7, 2020: Vawiin khan "Lawngtlai Quarantine Centre atanga hri vei pahnih tlan chhuak awm" anga 'VLTF Thingfal Tlangau' hminga thu chhuah chu social media-ah vawrh darh a ni a. Hemi chungchangah hian mipui tichi-ai thei zawnga thu vawrh darh a nih avangin Lawngtlai DLTF hmingin Lawngtlai Police Station-ah First Information Report (FIR) theh luh a ni.

FIR hi Lawngtlai DLTF ai awhin Lawngtlai Sub-Divisional Officer (Sadar)/Incident Commander Pu V. Lalruatliana'n a theh lut a. Mipui tiralkhel zawnga thu dik lo vawrh darhtu hi chhui chhuah an nih a, dan hmanga hrem an nih theih nan FIR hi theh luh a ni.

Social media-a he thuthang dik lo hi hmuh a nih veleh District thuneitute chuan Lawngtlai District chhunga Quarantine Centre-te an endik nghal a. Quarantine Centre leh Covid Care Centre-a khung hran lai tu mah kim lo an awm lo tih finfiah nghal a ni.

Lawngtlai District-ah tun dinhmunah COVID-19 vei (positive) mi 4 (pali) an awm mek a. An zavai hian Covid Care Centre-ah enkawl niin, medical team-in an hriselna dinhmun an vil reng a, dinhmun ngaihtuahawm emaw, kawhmawh bawl emaw an awm lo va, mipui tan chi-aina tur a awm lo a ni.

Lawngtlai DLTF Chairman, Bawrhsap Dr Andrew H. Vanlaldika chuan mipui tichi-ai leh tithlabar thei zawnga social media-a thu dik lo theh darh a ni chu pawi a tih thu sawiin, COVID-19 pandemic kaihhnawih thu theh darh kawngah mipuite chu fimkhur leh zual turin a chah a. Sawrkar thupek zawm lo va, thil tisualtute chu sawrkarin dan a zam beh chhana hrem an tul a ni, a ti.