No.2839/2020-2020
Lawngtlai, Vawkhniahzawn thla ni 7, 2020: Vawiin khan Lawngtlai District Rural Development Agency (DRDA), Lawngtlai Sub-Headquarters MHIP leh Chakma Autonomous District Council (CADC) te chuan COVID-19 dona kawnga Lawngtlai District Level Task Force (DLTF) tha tihchak nan tanpuina pawisa fai an hlan.

Lawngtlai DRDA hnuaia thawk Group A leh Group B staff-te'n sum an thawh tling khawm Rs 50,000/- (sing nga) chu vawiin khan Lawngtlai DRDA Project Director Pi Marilyn Rualzakhumthangi chuan Lawngtlai DLTF Chairman, Bawrhsap Dr Andrew H. Vanlaldika kutah hlanin, COVID-19 dona kawnga DLTF-in sum a mamawhna sang tak tlem azawng tala an phuhruk ve theih beiseia DRDA staff-te chuan tanpuina hlan an nih thu a sawi.

Lawngtlai Sub-Headquarters MHIP hruaitute pawhin vawiin vek khan Lawngtlai Bawrhsap chu a pisaah kawmin, COVID-19 hri leng dona kawngah a tul anga DLTF thawhpui zel an tum thu an hrilh a. July ni 6-a lawm thin MHIP Day puala DLTF an tanpuina pawisa fai Rs 5,000/- (sang nga) chu Sub-Headquarters MHIP Vice President Pi Vanlalhlupuii Fanai chuan DLTF Chairman kutah hian a hlan a ni.

Vawiin vek khan Chakma Autonomous District Council (CADC)-in COVID-19 dona atana Lawngtlai DLTF a tanpuina pawisa Rs 1,50,000/- (nuai khat sing nga) cheque chu DLTF Chairman chuan a dawng bawk.

Vawiina Lawngtlai DLTF kuta tanpuina sum lut hi a zavaiin Rs 2,05,000/- (nuai hnih sang nga) a ni a. Lawngtlai DLTF chuan COVID-19 dona kawnga tanpuina petute chungah lawm thu a sawi a ni.