Lawngtlai District Superintendent of Police (SP) thar Pu Amit Goel IPS chuan nimin khan a office-ah MJA Lawngtlai District te chu thingpui inpuiin, Lawngtlai District chhungah tha taka dan leh thupek kenkawh a nih zel theih nan thawh hopuiah a sawm.
Pu Amit Goel chuan Lawngtlai District chu international boundary thui tak nei a nih avangin venhimna lamah pawh tha thlah lova thawh a tul tih a sawi a. Chak zawka police hna a kal theih nan chanchinbu mite chu police-te finchhuah thin turin a sawm a ni.
Lawngtlai chanchinbu mite pawhin Lawngtlai District-a police tlem lutuk chu veiawm an tih thu leh Lawngtlai Police Station chu thuam that tul an tih thu te SP hi an hrilh bakah, Myanmar atanga raltlante dinhmun chu en chian ngaia an hriat thu an hrilh bawk a. Lawngtlai SP chuan an rawtnate chu lo bawhzui a tum thu sawiin, raltlante chu DC be rawn chunga tlawh thuai a tum thu a sawi bawk.
Lawngtlai District MJA te hi an President Pu ZD Dengngura'n a ho va. Media chakna hmunah police hna pawh a chak thin tih sawiin, chanchinbu mite chuan police tha tichak tura theih tawp an chhuah zel tur thu a sawi.
