Vawiin hi World Veterinary Day a ni a, Lawngtlai District AH & Vety Office chuan a thlawna ran entirna leh ui a hri venna (vaccine) pekna hun atan an hmang.
World Veterinary Day hi kum tin April thla inrinni hnuhnung berah hman thin a ni a. Kumin hian Lawngtlaiah chuan AH & Vety Dept huaihawtin State Veterinary Hospital-ah zing dar 7 atanga dar 10 thleng he Day pual hian hun hman a ni a. A thlawnin ran eng emaw zat an en bakah, ui 37 chu ui a hri venna pek a ni.
Kumin World Veterinary Day thupuiah hian "Role of the Veterinary Profession in Sustainable Development to improve Livelihood, Food Security and Safety" tih chu hman a ni a. Lawngtlai DAHVO Dr B. Zonghinga chuan Day thupui hmang hian thu sawiin, ram hmasawnna tluantling nei tura ran daktawr (veterinarian)-te mawhphurhna te, hriselna atan ran vulh atanga thar chhuah ei leh in pawimawhna te, chumia Mizoram kan la intodelh lohzia leh tan lak a ngaih thu te a sawi.
