LADC-a Education and Human Resource Development Department (M) buatsaih Lawngtlai khawpui chhung middle school-te tana hnam lam leh zai hmanga intihsiakna chu vawiin khan khar a ni a. Kharna hun hi AH & Vety Minister Pu C.Ngunlianchunga’n a hmanpui.
Pu C.Ngunlianchunga chuan LADC Education Department-in a tum khat nana Lai hnam lam leh zai chawi nunna tur middle school naupangte intihsiakna an buatsaih chu lawmawm a tih thu a sawi a. Sikul naupangtea hnam ziarang ngaihhlutna tuh chu hnam ziarang chawi nun nana thil pawimawh tak a ni tiin, kal khawmte chuan Lai an nihna zahpui lova chhuang zawk turin a chah.
Khual zahawm LADC-a Art & Culture changtu EM Pu L.Lawmkima pawhin Pathianin tuna kan nihna hnamah hian min siam a, chumi ang tak chuan kan par chhuak tur a ni, a ti bawk.
He intihsiak kharna hun hi LADC-a Education Officer (Middle) Pu F.Chungmanga’n a kaihruai a. Rev. Dr LH Lalpekhlua’n hunserh hmangin, Lawngtlai DIET Principal Pi Ngurhmingliani Chinzah pawhin thu a sawi a. Zai leh lam te ngaihthlak leh thlir ho a ni a. Intihsiakna lawmman sem a nih hnuin, LADC-a Assistant Education Officer (M) Pu Thansiama’n lawm thu sawiin hun khar a ni.
He intihsiak hi nimin June ni 22, 2016 atang khan neih tan niin, khawpui chhung atangin sikul 14 an tel thei a. Mal zai, zaipawl leh hnam lam hmang te’n intihsiak niin, a pumpuiah Downtown English School chu pakhatna an ni a. Govt Southern Standard Middle School chu pahnihna niin, pathumna chu Govt Thingkah Middle School an ni.
