Vawiin khan Chief Minister Pu Lal Thanhawla chuan cheng nuai 2126.01 senga sak Serchhip Auditorium a hawng a, Auditorium hawnna ah UD & PA Minister Pu Zodintluanga leh Lunglei West bialtu MLA Pu Chalrosanga te an tel bawk a ni.

Auditorium thar hawnna inkhawm Main Auditorium a buatsaih ah thu sawiin Chief Minister Pu Lal Thanhawla chuan lawm nachang hriat chu Pathian lawm zawng anih thu te, anachang hria te chu malsawmna in avur thin tih te sawiin lawmna reng ka nei lo ti thin te chu a hawisan thin a ni, a ti a. Sawrkar, pawl leh chhungkua reng reng tan an thil tih eng kimah Pathian lam tang a pawimawh leh a tul thu te sawiin politics ah pawh Pathian rawn chunga hma lak a pawimawh thu a tarlang.

Sawrkar policy leh programme reng reng chu a hun leh boruak awm te nen tehkhina chumi mila mipui mamawh leh duh te phuhru tur anga hma lak a tul thu sawiin rambuai thim chhah karah khatih lai khan remna leh muanna chu kan policy ber a ni a, remna leh muanna kan neih hnuin eizawnna ngelnghet mipuiin an neih theih nan leh in leh lo tha te an neih theih nan NLUP leh inchung tur rangva sem programme te kha duan chhuah a ni a. Vawiin ni thlengin NLUP hi chhunzawm niin a mamawh te tan inchung rangva tur pawh la sem zel a ni, a ti. Heng kan programme leh policy te hi sawichhiatna leh sawiselna karah te leh hmusitna leh rinhlelhna karah te a hlawhtling chho a mipuiin an tangkaipui hle a ni a ti. NLUP kal zel chungin a belhchah nan leh rahbi tleu leh la hlawhtling lote tanpui turin NEDP kalpui mek anih thu te leh ei che che economy atanga market econnomy-a Mizoram hruai luh chu a tum ber anih thu a sawi.

Chief Minister chuan Pathianin Mizo te lakah beisei a nei tih leh Mizo te hi a ram zauna leh Chanchin Tha hrilhna kawngah hman a duh tih te sawiin Ringtu za a za inchhal te hian kan khawsak zia leh kan thil tih leh hma lak dan hi Ringtu nihna nen a inhmeh em tih te ngaituah a tul thu a sawi lang a. Champhai leh Kolasib a doctor indaih lohna leh doctor insawn chungchanga thil thleng kha pawi ka ti a, mite tana harsatna siam hi Ringtute nunah a bet lo nia a ngaih thu sawiin he thil a Serchhip JAC te hma lakna kha a Kristianin a lawmawm a ni, a ti.

Serchhip Auditorium thar, Mizoram a Auditorium tha ber leh lian ber nia ngaih hawn a ni ta chu bial mipuite a lawmpui tih sawiin Serchhip District hi ram laili a awm anih avangin Department hrang hrangin hma lakna an nei a, heng hma laknaah hian neitu rilru pu turin mipuite ka chah duh che u a, Bial entawntlak ni turin ka sawm che u ni, a ti bawk a. Sum ngainatna hian kut tling lova sum lak pawisak lohna a hring a, hei hian hmasawnna hna tam tak Turial Hydel Project te, Sairang leh Bairabi rel kawng te leh Kaladan Multi Modal Transport Transit Project te a ti sukukin a hun takah kan zo thei lova, kuttlinglova sum lak pawisak lohna in nasa takin hmasawnna a tithuanawp mek a ni, a ti.

Tunhnaia CAG Report chungchang sawiin he Report a baseline survey ti lo anga ziak hi thu dik lo a ni a, YMA in khaw tinah baseline survey felfai takin an ti a, CAG hian an zahawmna an tihniam hle niin a ngaih theih a heti chuan India ram an ti chhe mai ang tih a hlauhthawn awm a ni, a ti.

Auditorium thar chu Serchhip District mipuite ta anih angin mipuite chu a enkawlna kawnga neitu rilru pua thianghliam leh tha taka dimdawi taka hmang turin a chah a ni.

UD & PA Minister Pu Zodintluanga chuan Serchhip Auditorium sak hna chu a hun taka zawh anih loh avanga pawi a tih thu sawiin he thilah hian mipui leh Sawrkar hriatthiamna a ngen a. Sawrkarin loneitu leh kuthnathawktute a ngaih paiwmawh rualin hmasawnna ruhrel duan leh sak pawh a ruala kal tur nia ngaiin tun kum 9 kalta khan nasa takin hmasawnna ruhrel hrang hrang Mizoram dung leh vanga siam leh sak ani thu a sawi a. Serchhip in hmasawnna ruhrel an neih belh chu a lawmpui thu sawiin Serchhip chu bial hmasawn tak nise tiin a duh thu a sawi a. He programme ah hian Aizawl chu Smart City inelna thar ber neiha thlan anih thu puangin Aizawl cheithatna tur vaibelchhe 500 kan dawng dawn a ni, a ti.

Auditorium hawnna programme hi UD & PA Department, Secretary Dr. C. Vanlalramsanga'n kaihruaiin Rev. R. Lalawmpuia'n hunserh a hmang a. Technical Report hi UD &PA Department, Director Pu Joseph H. Lalramsanga hnen atangin ngaihthlak a ni a. NBCC Ltd. General Manager Capt. Sharan pawhin thu a sawi a.Serchhip mipuite aiawha thusawitu Sub-Headquaters YMA Serchhip, President chuan Pu Lal Thanhawla kaihruai Sawrkarin District tan asset ropui tak Mizoram hmun danga awm lo an siamsak vangin lawmthu an sawi a. Serchhip DC Pi Sangchhin Chinzah in lawmthu sawiin programme kharna a nei a ni.

Serchhip Auditorium sak hna hi kum 2009 khan sanctioned niin hun engmaw chen sak anih hnuin a contractor hmasa in a sak thah loh vangin a contract tihtawp a ni a, chumi hnu November 2014 khan contractor thar hnenah a hna hi pek leh a ni. Serchhip Auditorium sakna tur sum cheng nuai 2126.01 hi Ministry of Urban Development tum an niin Implementing Agency ah NBCC Ltd hman an ni a, a Nodal Department chu Urban Development & Poverty Alleviation Department an ni. A building hi Mizo chhiara chawng thum niin VIP Lounge, Office Room, Refreshment Room, Exhibition Hall, Meeting Hall lian tak 2, mi 1000 len theihna Main Auditorium changtlung tak, sound leh light te nena tel, Control Room leh Inthiarna te a awm a. Auditorium pumpui built up area hi square metre 3400 vel a ni a. DG Set 250 kVA leh Transformer 125 kVA te daha ni bawk.