Vawiin chawhnu dar 3 khan Home Minister Pu R. Lalzirliana chuan MFA leh Central YMA tangkawpin an buatsaih TT Royte Trophy - Inter Branch YMA Football Tournament kharna inkhawm A.R. Lammual ah Khuallian niin a hmanpui a. He hun hi Health Minister leh MFA President ni bawk Pu Lal Thanzara  pawhin a hmanpui a ni. 

Pu R.Lalzirliana chuan Mizo infiam mite chu Mizo hnam tan infiam anni tih inhria in an thiamna leh theihna te Mizoram hmingthatna atan hmang zel turin a chah a. Sawrkar hmalakna hnuaiah thalai leh infiammi te tan Ground tha tak tak te chhawpchhuah ani zel chu lawmawm a tih thu a sawi bawk a.  I-league ah India ram puma Mizoram Club AFC an champion thei chu lawmawm a tih thu sawiin Home Minister chuan India ram aiawha ram pawna inkhel turte leh India ram chhunga Club tha ho ah pawh Mizo hlang deuh thaw an khelh theih nan, thalaite chu ruihhlo laka fihlimin theihtawp chhuaha infiamna lama hmasawn turin a fuih bawk a. Pu R. Lalzirliana chuan tangruala theihtawpa hma kan lak chuan tun atanga kum 10-ah chuan infiamna lama Zofate thlen chin  a sang dawn a, hmuh a chakawm tawh hle a ni, a ti. 

He hunah hian Health Minister, MFA President ni bawk Pu Lal Thanzara chuan Mizorama tlawmngai pawl lian ber YMA in football Mizo thalaite  tuipuiin hetiang Tournament a buatsaih chu lawmawm a tih thu a sawi a. Mizo te India ram football-a an thlen sang tawh thu sawiin Kumpinu hun lai atanga India rama football Club lo awm tawh Club lian leh hlun tak tak ah te pawh Mizo players tel lohna a awm tawhlo a ti a. Pu Lal Thanzara  chuan vawiin  International Olympics Day anih thu leh Mizote eng Olympics berah emaw an tel ve ngei theih nan sawrkarin hma a lak mek thu a sawi bawk a ni. 

TT Royte Trophy Inter Branch Football Tournament 2017 hi TT Royte Group Sponsor niin Central YMA  leh MFA tangkawpin an buatsaih a, May ni 16 atang khan khelh tan a ni. Tun hi Central YMA-in Inter Branch YMA Football Tournament  vawi 19 an buatsaihna a ni a, tun tumah hian team 141 an tel a. Champion team chuan Trophy, medal, certificate leh cheng nuai 1 an dawng dawn a, Runner- Up in Trophy, medal, certificate leh cheng 50,000 an dawng bawk ang. Semi-finalist te chu cheng 10,000 pek niin quarter finalist te chu cheng 5000 theuh pek anni bawk. Heng bakah hian Fairplay award, top scorer leh best player award te sem a ni ang. 

Tournament kharna inkhawm hi Pu Lalrochhuanga Pachuau, Chairman Organising Committee & Financial Secretary CYMA in a kaihruai a . Organising Secretary Pu Peter Chakchhuak hnen atangin report ngaihthlak niin Pu Lalbiakzuala CYMA President leh Pu Robert Romawia Royte Chairman TT Royte Group hnen atangin thusawi ngaihthlak bawk a ni. 

Tournament kharna inkhawm zawh ah hian Final khelh nghal a ni a, Final hi Ramhlun South Branch YMA leh Chanmari Branch YMA team ten an khel a ni.