Lawngtlai town sanitation task force chu vawiin khan Lawngtlai DC Conference Hall-ah SDO (Sadar) Pi Rochuangkimi Khenglawt hovin an thu khawm a. Faina Hapta (Cleanliness Week) 2019 leh Swachhata Hi Seva (Mass Cleaning of Plastic Waste) hman dan tur an rel.

Kumin Faina Hapta hawnna hun chu October ni 2, 2019 zing dar 7-ah Lawngtlai Bazar Venga Areopagy hmunah hman ni se, tih a ni a. Hawnna hun hman zawhah Lawngtlai khawpui chhunga sawrkar official te, sikul naupang te, scouts & guides te, National Service Scheme (NSS) leh DAY-NULM hnuaia Self Help Group te'n faina kawng zawhin, khawlai dunga bawlhlawh then fai hnatlang an nei chhunzawm ang. Faina hapta chhung hian faina kawnga intihsiakna leh inzirtirna hrang hrang kalpui tum a ni a, a kharna hun hi October ni 9, 2019-ah hman tum a ni.

Vawiin thut khawmah hian Swachhata Hi Seva puala hma lakna atan Lawngtlai khawpui chhunga village council (VC) 12 te'n anmahni remchan hun azirin October ni 27, 2019 hmain an huam chhungah theuh plastic leh polythene hnawmhnawk then fai runpui hnatlang buatsaih se, tih a ni a. Faina kawnga inzirtirna pawh veng chhungah uar zawka puan ni se, tih a ni bawk. Tunlai hian Lawngtlai khawpui chhunga veng thenkhat chuan an veng a lo thianghlim zawk theih nan plastic bawlhhlawh, lehkha chhia leh buara te veng chhung mipuite hnen atangin an leisak thin a ni.