Vawiin chawhnu khan Conference Hall, Assembly Annexe, Aizawlah Pradhan Mantri Kisan Maandhan Yojana (PM-KMY) tlangzarhna hun hman a ni a, Agriculture Department Minister Pu C Lalrinsanga chu khuallian niin Pu Lalhmingthanga, Commissioner & Secretary, Agriculture Department in he hun hi a kaihruaia, MLA Pu C Lalmuanpuia, Pu K Pachhunga, Dr ZR Thiamsanga, Pu L Thangmawia, Pu Zothantluanga, Pu Andrew H Thangliana, Pu C Lalsawivunga, leh Pu VL Zaithanzama ten telpuiin Department hrang hrang hotute leh loneitu thahnem tak an tel bawk a ni.

Pu C Lalrinsanga, Agriculture Minister chuan Pradhan Mantri Kisan Maandhan Yojana (PM-KMY) chu tlangzarhin, Mizorama loneituten tangkai taka an hman a, a dawng thei awm mi dangte pawh inhrilh hre zel turin a chah. Minister chuan, Sawrkai laipui atanga sum hmuh thin te chu kan ram chhungah ngei peipum thiam a, Mizoram economy siam that nana hman thiam a tul hle thu sawiin, ngaihtuahna fim tak hmanga ei leh bar a intodelh tuma hmalak a pawimawh thu a sawi bawk. Pu C Lalrinsanga chuan Sawrkar hmalakna hnuaia hmachhawp thuhmun si mah se thawktu emaw thawh dan hrang tlat si a awm thin chu siam rema, chak leh mumal zawka hna kalpui a tul thu a sawi. Minister chuan Agriculture department in loneituten awmze nei zawk leh hlawk zawka an buh leh thlaite an tharchhuah theih nan district pali ah FOCUS kalpui mek anih thu leh Global Environmental Facilities hmanga hmalak anih thu a sawi a, State Agriculture Management and Extention Training Institute Training Centre sakna tur te, Biological Control laboratory, Seed Testing Laboratory leh Biofertilizer Unit sak anih theih nana hmalak mek anih thu a sawi bawk a ni.

PRADHAN  MANTRI KISAN  MAANDHAN  YOJANA (PM-KMY) FARMERS’ PENSION  SCHEME CHUNGCHANG A HRIATTUR PAWIMAWH TE:

PRADHAN MANTRI KISAN MAANDHAN YOJANA (PM-KMY) hi Sorkar laipuiin India ram puma loneitute, ram Hectare 2 aia zaulo neite hnenah an lo upat a, an tan kut hnathawka eizawn a lo harsat hun atan leh hlim taka an khawsak ve theih nan Pension Scheme, kum 60 an lo tlina an hman tan theih tur a duan a ni.

He Pension Scheme hnuaiah hian loneitute an inziahluh a, ruahmanna siam ang thlap an zawm chuan kum 60 an lo tlin hunah thla tin Rs. 3,000/- an la thei dawn a ni. Loneitu kum 18 atanga kum 40 tan inziahluh theih a ni a, thla tina an pek tur zat pawh hi an upat dan a zirin bithliah fel vek a niin, kum 18 chuan thla tin Rs. 55/- a pe anga, kum 40 chuan thla tin Rs. 200/- a pe ang. Loneituin a pek ang zat zel hian Sawrkar-in a lo do let ve zel ang. He Scheme-a in-register duhte chu an awmna atanga Common Service Centre hnai berah an Aadhaar Card leh Bank Pass Book kengin an in-register thei a, in-register-na atan hian fee engmah chawi ngai a awm lo. Common Service Centre-te hi Sorkar laipuiin enrollment ti tura a ruat an ni. Tun dinhmunah chuan Mizoram-ah CSC-a thawk mi 460 an awm a, chung zingah chuan active tak chu 178 an ni. Thla tina loneituin a chhun luh ve tur hi PM-KISAN-a beneficiary lo ni tawh te tan chuan anmahni duhthlannain PM-KISAN hnuaia pawisa an dawn tur atangin Pension Fund-ah direct-in chhun luh sak theih an ni. Thla tina pek remchang lote tan thla thum dan (quarterly) emaw, thla 4 dan (4 monthly) emaw kum chanve dan (half yearly) emaw pawhin pek hun tur ni bithliah (due date)-ah chat chat a pek theih a ni. A due date hi he Scheme-a in-register ni zel a ni.

PM-KMY hi Sorkar laipui leh Life Insurance Corporation of India-te tangkawpa din a nih angin Pension hi LIC Pension Fund atanga pek chhuah thin a ni ang.

He Scheme-ah hian loneitute nupui/pasal pawh a hrangin a in-register theih a, a hrangin pension pawh kum 60 an tlinah Rs. 3,000/- ve ve an dawng thei ang.

Loneitu, he Scheme-a inziak lut hian a lo boral hnua a aiawha hamthatna a dawn ang dawng zui turin a nupui emaw, a pasal emaw, amahin a enkawlte zinga mi emaw a nominate thei ang.

He Scheme-a subscriber-ten thla tina an thawh ve tur kum upat dan a zirin a hnuaia mi ang hian bithliah a ni a, an thawh ang zat zel hian Sorkar-in a lo do let ve dawn a ni.

Loneitu, he Scheme-a inziak lut, kum 60 a tlin hmaa boral an awm chuan a nupui/pasal-in thla tina a pek thin pe chhunzawmin a nupui/pasal boral ta-in kum 60 a lo tlin hun angah pension hi a la thei dawn a ni. Amaherawhchu, a nupui/ pasal hi he Scheme-a lo inziak lut (registered) ve tho a nih chuan a pek chhunzawm theih loh ang. A nupui/pasal boral ta-in thla tina a pek thin a pek chhunzawm duh lo a nih chuan a boral ta-in a lo thawh tawh chu a pung nen a nupui/pasal hnenah pek a ni ang.

Loneitu, he Scheme lo zawm tawh pawhin eng emaw avangin eng hunah pawh chhunzawm duh lovin a bansan thei a, chutiang a nih chuan a lo thawh tawh ang ang chu a pung nen a dawng let leh vek ang.

Loneitu, in-register tawh nupui/pasal nei lo, kum 60 a tlin hmaa a lo boral chuan a nominee hnenah a lo thawh tawh chu a pung nen pek a ni ang.

FAMILY PENSION :

Loneitu, he Scheme-a in-register, kum 60 a tlin hnua pension la mek a lo boral a nih chuan, a nupui/pasal hnenah FAMILY PENSION Rs . 1,500/- pek chhunzawm a ni ang. Amaherawhchu, a nupui/pasal hi he Scheme-a in-registered ve tho a nih chuan a dawn chhunzawm theih lohva, Family Pension hi chu nupui/pasal tih loh chuan a dawn theih loh.

NOMINATION CHUNGCHANG :

Subscriber hian a boral hnua a aiawha hamthatna a dawn ang dawng zui turin a nupui/ pasal emaw amahin a enkawl/chawmte zinga mi ziakin a dah tur a ni. A tul dan a zirin ziak ngeia thehlutin siam that leh theih a ni.

Subscriber-in a dam laia nominee thar online emaw CSC emawa a thehluh pawmna hi amah a lo boral hman a nih pawhin midangin tih danglam theih a ni lovang. A nominate tharte hi notice chhuah atanga hman tan a ni ang.

Subscriber-in a nominate a hi naupang kum tling lo emaw, pian phunga rualbanlo emaw an nih chuan a boral thuta an ai lo awh lailawk tur a ruat thei ang.

Subscriber hian mi pakhat aia tam a nominate a, an insem zah tur a ziak lo a nih chuan a inzatin an chang ang. A nominate zinga pakhat hi a lo boral a nih chuan a nominate dangte’n inzatin an chang anga, a subscriber hian hetiang lo thleng thut thei laka an chan zah tur ziaka a dah chuan chu chu hman a ni ang.

He KUTHNATHAWKTU PENSION-a subscriber ni ve thei lo tura Sorkar-in a tih thenkhatte chu :-

Kuthnathawktu Sorkar laipui Scheme, National Pension Scheme (NPS), Employees State Insurance Corporation Scheme, Employees Fund Organization Scheme etc. a tel te.

1) Pradhan Mantri Shram Yogi Maan Dhan Yojana (PM-SYM) thlangtu te.

2) Pradhan Mantri Laghu Vyapari Mandhan Yojana (PM-LVM) thlangtu te.

3) Kuthnathawktu ram hectare hnih (2) aia zau lo, nei tho si, khawsak harsa lo zawka ngaih te chu he Scheme-a subscriber hi an ni ve thei lova, a tlangpuiin a hnuaia tarlan te hi :-

i) MLA, MP, Mayor of Municipal Corporation, Chair person, District Panchayats lo ni tawh te.

ii) Sorkar hnathawk mek leh pension tawh te.

iii) Income Tax pe chin te.

iv) Doctor, Engineer, Lawyer, Chartered Accountant, Architect.

Mizoram Sorkar pawhin chak taka hma lain, farmer’s tam zawkte’n he Scheme hi an hman tangkai theih nan State Level Committee on PM-KMY a din tawh a, Common Service Centre-te, BDO-te leh khawtlang hruaitute nena he Scheme a lo hlawhtlin theih nana thawhho dan tur te pawh a rel tawh a ni.