Lawngtlai mipuite nghahhlelh em em Greater Lawngtlai Water Supply Scheme (GLWSS) tuilak thar chu Diesel Engine hmanga pump chhuah niin nimin atang khan Lawngtlai khawpui chhungah sem tan a ni a, vawiinah pawh sem chhunzawm ani.

Kum 2011 atanga bul tan, Crore 25.64 senna Greater Lawngtlai Water Supply Scheme hi Non Lapseable Central Pool Resource sum hmanga sak niin Chhimtuipui tui Chawnhu tlanga Pump chhohna ruahmanna a ni a, Chhimtuipui atanga tui hip chhohna san zawng hi Meter 1010 niin Tui Pipe lian Metre 6938 zet zam chhoh a ni. Hei hian kum 2040 AD a Lawngtlai mipui awm zat tura rin mi 38,455 thleng nitin mi pakhat zel tui Litre 40 pe thei tura beisei a ni. Tunah hian Diesel Engine hmangin darkar khatah Litre 12,800 pump theih a ni a, Chawnhu tlanga a zempui Litre nuai 5 dawngah leh Lawngtlai khawpui hmun hrang hranga Tanky dah darh (Distribution Tank) 5, an vaia Tui Litre nuai 9 dahkhawl theihnaah dah khawl niin chuta tang chuan mipuite hnenah sem a ni.

GLWSS hi Kawlphetha chakna hmang tura ruahman, thlavenga Diesel hmang chauh tur a nih avangin vawiinah hian PHE leh P&E Lawngtlai chuan Chief Inspectorate ruahmanna in Electric luh tir chhin (Test Charge) an nei a. He Test Charging hi darkar 50 neih a nih hnuah Electric hmang hian darkar 2 Pump chhin a ni ang a, chumi hnuah tha tawka Chief Inspectorate lam in a ngaih chuan Clearance Certificate a pe anga chumi hnuah E-in-C, P&E phalna in P&E Department lamin Power an thlunzawm sak leh ang a, hawn theiha peih fel a ni tawh dawn a ni. Sr EE, PHE Lawngtlai WATSAN Division Pu Ngentluanga chuan, tluang tak leh rang taka Power Supply Connection an hmuh theihnan theihtawp chhuah reng a nih thu sawiin P&E Depertment leh Chief Inspectorate Office ten an tanpuinaah lawmthu a sawi a ni.

Lawngtlai khawpuiah tui a harsat avangin GLWSS tui ngei sem theiha a awm ta chu mipuite an hlim hle a, tlawmngaipawlte leh Village Councils te pawhin PHE Department hi an theih ang angin hnathawhnaah an lo puibawm fo tawh nghe nghe a ni.