Vawiin chawhma dar 10:30 khan Lawngtlai District Level Committee on Green Mizoram chu Additional Deputy Commissioner Pu R.Lalsangluaia hovin DC Conference Hall-ah an thu khawm a. Green Mizoram Day 2016 hman dan tur an rel.

Meeting kaihruaitu Additional DC chuan Green Mizoram leh Fire Prevention hi thil inkawp tlat a ni a; kangmei tihchhuah loh hi Green Mizoram thil tum pakhat a ni, a ti a. Member Secretary Pu PC Lalchhandama, Deputy Conservator of Forests (Wildlife) chuan nikum (2015) Green Mizoram Day hma lakna a tar lang.

Nikumah Lawngtlaia sawrkar department hrang hrang leh NGO te’n thing tiak 430 an phun zinga 236 chu nungin, chu chu 54.88% a ni a. Department thenkhatin anmahni rama an phun laiin, department tam zawk leh NGO te chuan Mampui kawngah an phun thung a. Derpartment thenkhatin an thing phunte chu uluk takin enkawl zui mah se, a tam zawk chuan an ngaihsak zui lo, tih report a ni.

Committee chuan kumin hian Lawngtlai khawpui chhung leh a chhehvelah thing phun ni se, phun tur thing leh a phun dan tur pawh uluk taka ruahman ni se, an ti a. A phun tam lam aiin a nung tam lam ngaih pawimawh zawk ni se tiin, thing phuntute paw’n mahni thing phunte puitling ngei tura tha taka an enkawlna turin hma lak ni se, an ti bawk.

Vawiin meeting-ah hian June ni 11, 2016 (inrinni)-a Lawngtlaia Green Mizoram Day hawnna hun hman dan tur duan nghal a ni a. “Thing phun la, boruak thianghlim siam rawh” tih chu thupuiah hman a ni ang. Meeting-ah hian member-te an kal tha hle.