Vawiin khan Lawngtlai Chief Judicial Magistrate (CJM) office huaihawtin Lawngtlaia Govt Region HSS-ah dan lam inzirtirna (legal awareness campaign) buatsaih a ni.

He hunah hian CJM Pu BT Lala Sakachep MJS chuan Legal Literacy Club a hawng nghal a. Zirlaite chu dan hriatna kawngah tan la zel tur leh Legal Literacy Club hawn thar chu tangkaipui ngei tuma tuichilh turin a chah.

GRHSS Lecturer i/c Legal Cell Miss Laldinmawii chuan he hun hi a kaihruai a. Resource person, Advocate Pu C. Lalrinfela chuan zirlaite chu an hriat tur pawimawh dan chi hrang hrang - Consumer Rights, Information Technology Act, Juvenile Justice Act leh Protection of Women from Sexual Harassment te a zirtir a. Sikul Principal Pu H. Vanlaltanpuia'n lawm thu sawiin, hun a khar a ni.

Legal Literacy Club din hi National Legal Services Authority (NALSA) hma lakna niin, dan leh hrai lama tui mi sikul naupangte’n an phak tawka dan leh hrai an zir a, khua leh tui tha ni tura buatsaih an nih theih nana din a ni a. India ram pumah Club 1000 chuang din tawh niin, member-ah zirlai naupang nuai hnih chuang an awm mek a ni. GRHSS Legal Literacy Club-ah hian member zirlai naupangte chu zirtirtu pakhat (nodal teacher)-in kaihruaiin, DLSA atangin a tul angin an vil zui reng bawk dawn a ni.