Vawiin khan Horticulture Minister Pu PC Lalthanliana’n sawrkar laipui Rashtriya Uchchatar Shiksha Abhiyan (RUSA) scheme kaltlanga cheng nuai 70 senga sak Government J Buana College (GJBC) Classroom Building a hawng. He hunah hian Lunglei District sawrkar official-te leh Government J Buana College zirtirtu leh zirlai thahnem tak an tel.

Pu PC Lalthanliana chuan Government J Buana College-in RUSA Scheme kaltlanga Classroom Building thar changtlung tak an nei chu a lawmpui thu sawiin tangkai taka an hman theihna turin duhsakna a hlan a. Zirlaite tan tumruhna tak tak leh hlawhtlin duh tak tak na rilru neih a pawimawh thu sawiin Minister chuan zirlai kalkhawmte chu tum mumal tak nei a, ram leh khawtlang tana mi chhawr tlak ni tura tan la turin a fuih a. Competitive Exam hrang hrangah Lunglei lam hming a lang khat thin chu pawi a tih thu sawiin Mizoram Youth Commission (MYC) hmalakna hnuaia Lunglei khawpui chhunga Coaching Centre hrang hrang hawnte chu hmang tangkai turin zirlaite a chah a. Hlawhtling tur chuan rilru chhel tak put a tul a ni tiin Minister chuan zirlai nih laia nuamsa taka lehkha zir hi hlawhtlinna a ni lo a, harsatna phenah hlawhtlinna a awm zawk, chhelna phenah malsawmna a awm zawk tiin zirlaite chu an hlawhchhamna te pawh hlawhtlinna kailawn bituk nan hmang turin a fuih a. GJBC campus hmun thar tur pawh ngaihtuah mek a nih thu sawiin sawrkar official-te nen chak taka hma an lak mek thu Minister hian a tarlang bawk.

Vawiin hawnna programme hi Pu Thlengliana, Associate Professor, GJBC in a kaihruai a, Dr Vanlalngaii, Associate Professor in kalkhawmte lawmna thu a sawi a. Pu F. Lalromawia, RUSA Coordinator-in lawmthu sawina hun a hmang bawk.

 Vawiin Classroom Building hawn hi sawrkar laipui Rashtriya Uchchatar Shiksha Abhiyan (RUSA) scheme kaltlanga cheng nuai 70 senga sak a ni a, Lushai Engineers-in he building sak hna in an thawk a ni. Government J Buana College (GJBC) hi kum 1983 a din niin tun dinhmunah zirlai 537 an awm mek a ni. 

Attachment

  • Loading attachment...