1567/2025-2026

Lawngtlai, 24th September 2025: Nimin khan Mizoram Premier League Season - 12, Round- 10 Lawngtlaia khelh tur chungchangah MPL Lawngtlai Organising Commitee ten DC Office Chamber - ah thutkhawm thawh thumna an nei a. Pu Donny Lalruatsanga, Lawngtlai Bawrhsap leh Chairman, MPL Lawngtlai Organising Committee, nibawk chuan thutkhawm hi a kaihruai.

Pu Donny Lalruatsanga chuan kalkhawmte hnena lawmthu sawina neiin, Mizorama League lian leh ngaihhlut tak Lawngtlai hmuna khelh turah chak taka hmalak chhunzawm zel a ni, a ti a. MPL Season - 12, Round -10 hlawhtling taka khelh a nih theih nan Organizing Committee - ten theihtawp an chhuah zel thu tarlangin, hmawr bawk tep a nih thu a sawi a. Hmabak tih tur awm ang angte pawh zawh thuai a ni ang, a ti. Bawrhsap chuan Organising Committee - te a tawp thleng a theihtawp chhuah zel tur a chahin, Lawngtlai mipuite a hmun ngeia inkhel en vek turin a sawm nghal bawk.

Pu Joseph Lalhmingthanga Chinzah, Organising Secretary, chuan Chairman leh Member - te inpekna kawng hrang hrangah lawmthu sawina neiin, hmalak tawhna report tawi pekna a nei nghal a. MPL Team thlen dan tur, an thlenna hmun leh hmuah dan turte tihfel vek tawh a ni, a ti a. Sanitation Department LADC- te pawh a hmunhma tifai tura biak fel an nih tawh thu a sawi a, Security Duty -tur pawh biak fel tawh an nih thu a tarlang a. Inkhel en tumte tan Ticket- Rs. 50 leh Rs. 500 man siam chu hralh chhuah mek zel a ni tiin, CYLA Playground- a siam that ngaite pawh chak taka siam mek a nih thu a tarlang a.MPL Season -12 Round- 10 hawnna programme - pawh siam fel a nih tawh thu a tarlang.

Thutkhawmah hian thil pawimawh tak tak sawiho nghal a ni a. District Sports Centre, College Veng panna kawng chu siam that mek chu chak zawka hnathawh a nih theih nan bawhzui ni se an ti a. Ticket hralh kawngah tan lak thar ni se tiin, Advertisement - ti ture pawh ngawrh zawka zawn leh ni se an ti a ni. Inkhelh Ni bikah motor lut leh chhuak fel fai tak a awm theih nan SP hnenah ngenna mumal tak siam a pek ni se an ti a ni.

Vawiin thutkhawmah hian MPL Lawngtlai Organising Commitee Member- te an tel kim tha hle a, Pu Donny Lalruatsanga, Lawngtlai Bawrhsap chuan lawmthu sawina neiin hun a khar.

MPL Season 12, Round- 10 hi October Ni 2 leh Ni 3, Dar 12: OO PM leh Dar 3:00 PM - ah te CYLA Playground- ah khelh a ni ang.