1503/2025-2026

Lawngtlai, 19th September 2025: Nimin khan Mizoram Premier League Season - 12, Round- 10 Lawngtlaia khelh tur chungchangah MPL Lawngtlai Organising Commitee ten DC Office Chamber - ah thutkhawm thawhhnihna an nei a. Pu Donny Lalruatsanga, Lawngtlai Bawrhsap leh Chairman, MPL Lawngtlai Organising Committee, nibawk chuan thutkhawm hi a kaihruai.

Pu Donny Lalruatsanga chuan kalkhawmte hnena lawmthu sawina neiin, Mizorama League lian leh ngaihhlut tak Lawngtlai hmuna khelh turah chak taka hmalak chhunzawm zel a ni, a ti a. MPL Season - 12, Round -10 hlawhtling taka khelh a nih theih nan Organizing Committee - ten theihtawp an chhuah zel thu tarlangin, Lawngtlai mipuite pawh inkhel en vek turin a sawm nghal bawk.

Pu Joseph Lalhmingthanga Chinzah, Organising Secretary, chuan hmalak tawhna report tawi pekna a nei a. MPL Club - te tan Liaison Officer (LO) ruatfel vek tawh niin, Club- te thlenna tur pawh tihfel a nih tawh thu a sawi a. Club- te thlenna hmuna mamawh tur tui leh kawlpetha chungchangah pawh ruahmanna siam fel a nih tawh thu a sawi a. Inkhel en tumte tan Ticket- Rs. 50 leh Rs. 500 man siam niin, hralh chhuah tan mek a ni, a ti a. CYLA Playground- a siam that ngaite pawh chak taka siam mek a nih thu a tarlang.

Thutkhawmah hian thil pawimawh tak tak sawiho nghal a ni a. MPL team thlenna tur pakhat District Sports Centre, College Veng panna kawng chu siam that ni se tih niin, PWD leh YLA,VC, College veng ten hma lo la se an ti a ni. Sum mamawhna a sang hle tih pawm tlangin, Mimal, Sumdawng leh Department- atanga 'advertisement' ti duh turte zawn nia se an ti a ni. MPL Season -12 Round- 10 hawnna changtlung taka neih hi se tiin, zaithiam bakah lam entir turin Downtown English School leh Donbosco School Brass Band- te sawm ni se an ti a. Remchang hmasa berah thutkhawm hi neih leh ni se an ti bawk.

He thutkhawmah hian MPL Lawngtlai Organising Commitee Member- te an tel kim tha hle a, Pu Donny Lalruatsanga, Lawngtlai Bawrhsap chuan lawmthu sawina neiin hun a khar.

MPL Season 12, Round- 10 hi October Ni 2 leh Ni 3, Dar 12: OO PM leh Dar 3:00 PM - ah te CYLA Playground- ah khelh a ni ang.