1502/2025-2026

Bengaluru, 19th September, 2025 : Nimin khan Transport Minister Pu Vanlalhlana chuan Karnataka sawrkar Transport Department hnuaia hmalakna hrang hrang Bengaluru khawpuia awmte chu a hmunah tlawhin a zirchiang a. Minister hi Transport Director Er. R. Lalrammawia leh Under Secretary Vanlalmuana ten an tawiawm a ni.

Karnataka State-a Registered Vehicle Scrapping Facility (RVSF) pahnih zinga pakhat, Devanahalli-a Mahindra MSTC Recycling Pvt Ltd (Cero) chu tlawh hmasa berin, lirthei chi hrang hrang an thiah darh dan te a en a. Certificate of Deposit (CoD), Certificate of Vehicle Scrapping (CVS), lirthei neituin a thar a lei leh dawna rebate a claim dan te leh motor part an lilam dante kimchang takin an lo hrilh a ni.

Nelamangala-a Ministry of Road Transport and Higwhays (MoRTH) hmalaknaa din hmasak ber Inspection and Certification Centre a en leh a. He Automated Testing Station (ATS)-ah hian lirtheite khawl hmanga test chi hrang hrang kapui dante en a. He test chi hrang hrang paltlang thei lo te chu hun pek belh thin an ni a, hun tiam chhunga an siamthat theih lo emaw, a test-na fee an chawi theih loh chuan Fitness Certificate (FC) pek an nih loh bakah, an lirthei hren sak thin a ni.

Jnana Bharathi RTO hnuaia Automated Driving Test Centre a tlawh leh a. Driving license dil te tan 2-wheel leh 4 wheel driving track buatsaih niin, test hi khawl hmanga endik a nih bakah result hi khawl hmanga pek chhuah thin a ni.

Hemi hnu hian Karnataka Transport Minister Dr. Ramalinga Reddy nen an inkawm a. Pu Vanlalhlana chuan Transport Department-in an lo dawnsawn danah a lawm thu a hrilh a ni. Mizoram Transport Minister in a tlawh tak hmun hrang hrang te hi Ministry of Road Transport and Highways (MoRTH) ruahmanna anga State tina siam tura tih a ni a. Hengte nei ve tur hian Mizoram sawrkar chuan a tul angin hma a la chho mek a ni.