485/2025-2026

Lawngtlai  20th May, 2025 : Tukin  zing dar 7:30 AM khan  National Tuberculosis Elimination Programme (N.T.E.P), District T.B.Centre (D.T.C) Lawngtlai huaihawtin '100 Days T.B Campaign' hawnna chu Chandmary Square, Lawngtlaiah neih a ni a,  Dr.Lorrain Lalpekliana Chinzah, Adviser to Chief Minister (H&FW) leh Lawngtlai East bialtu MLA nibawk chuan  khuallian niin a hmanpui.

Dr.Lorrain Lalpeklian Chinzah chuan  campaign hawnna a tel official, ANM zirlai leh mipuite chunga lawmthu sawina neiin, hlawhtling taka kalpui tura  '100 Day T.B. Campaign' a hawng thu a sawi a. T.B natna hi Mizote zingah  hluarin,  a bik takin Lawngtlai District  leh district hnufual deuhah chuan harsatna lian tak tawh zinga mi a ni a, chutih rualin sawrkar leh thawktute inpekna avangin nasa taka hmasawn  a ni,  a ti.  MLA chuan  World Health Organization (WHO) in kum 2030 ah khawvel atanga  T.B umbo a tum thu tarlangin,  India ramah chuan kum 2025- ah umbo tura  campaign  kalpui mek a ni a, chutih rualin  hmachhawp a la tam hle  tiin Civil hospital lam hotute leh staff-  te theihtawp chhuah turin a sawm  a ni.

Khuallian chuan sawrkar hmalakna hrang hrang zingah, a bik takin Health Department hmalaknaah a hlawhtlinna chu mipuite kutah a innghat thui hle a ti a. Mipuiten an tih tur ang ang tha taka an tih ve chu thil pawimawh hmasa a nih thu a sawi. TB bikah chuan a lan chhuah dan hrang hrangte sawi nasat tawh niin, hmun hrang hrangah poster  pawh tar a ni bawk a, mahni  inrinhlelhna neite   chuan a hma thei ang ber a T.B Centre-  pan thin turin  mipuite a sawm. A sawi zelnaah MLA chuan  natna hrim hrim hi hmuhchhuah hma anih  chuan enkawl dam vat theih a ni tiin, mipuite chu mahni hriselna ngailawimawh thar turin a chah a.  Dr. Lorrain Lalpekliana Chinzah chuan '100 days T.B Campaign'  hlawhtling taka kalpui  a nih theih nan sawrkar Department leh mipuite tha taka  thawk tlang tura ngenin,  duhsakna a hlan nghal bawk.

Dr. Remlalnghaki, Dy. CMO leh  District T.B Officer, nibawk chuan  'National Health Mission'  hnuai a National T.B Elimination Programme kalphung leh 100 days T.B Campaign - in a tumte sawifiahna a nei a. Chak taka T.B vei hmuhchhuah leh  enkawlna tha tak pek chu hna hmasa nih thu sawiin, Kum 2025- a T.B umbo tura hmalakna hrang hrang kalpui mekte  a tarlang nghal a ni.

'100 days T.B Campaign'  hawnna inkhawm hi Dr. David Zothansang, Sr.CMO, Lawngtlai District chuan kaihruaiin,  Pu K. Lalnunsanga, District PPM Coordinator,  chuan  lawmthu sawina neiin hun a khar.