484/2025-2026

Aizawl; the 20^th May, 2025: Vawiin chawhma dar 10:00 khan Zarkawt Community Hall-ah National AYUSH  Mission, Directorate of AYUSH leh Mental Health Programme, Social Welfare Department  te bultumin “ 3 Days Capacity Building Programme for Medical Officers on AYUSH De-Addiction Programme”  buatsaih niin, Pi Lalrinpuii, Hon'ble Minister of Health & Family Welfare Dept., Social Welfare, Women & Child Development chuan khuallian niin Training hawnna inkhawm tawi a hmanpui.

Training hawnna thuchah sawiin Pi Rinpuii chuan Mental Health leh AYUSH lama thiamna hmanga tunlaia Mizoram puma kan buaipui ruihhlo ngawlveite enkawl tura kan Medical Officer-te tuaitharna training, Directorate of AYUSH leh Mental Health Programme, Social Welfare Department ten resource person thiam tak hnuaia ni 3 awh Training an buatsaih chu lawmawm a tih thu sawiin, Mizoram hmun hrang hranga Allopathy leh Ayush Medical Officers thlanbik kal khawm te chu an training hlawk taka an hman tangkai theih nan uluk tak leh rilru pe taka training turin a chah.

He Training hawnna inkhawmah hian Social Welfare Director, Dr.Lalhriatzuali Ralte IAS pawhin thu sawina hun hmangin, Department thawhhonah lawmawm a tih thu leh hun lo kal zel turah pawh chhunzawm zel thei ni se a duh thu a sawi bawk.

Resource person atana sawm Dr. Ravindra Rao, Professor, National Drug Dependence Treatment Centre, AIIMS, New Delhi pawhin thu sawina hun hmangin,India ram hmun hrang hrangah hetianga Health Department leh Social Welfare Department thawhhona hi a la hriat tam loh thu sawiin, rah ṭha tak a chhuah ngei a beisei thu a sawi.

Training hun hi ni 3 chhung awh tur niin, Ruihhlo leh a kaihhnawih ngawlvei te enkawlna chungchang zirho a ni ang. He trainingah hian Dr.Rao hian thupui hrang hrang 15 hmangin Medical officer te zirtirna a pe dawn a ni. He  training hi a bulṭanna tur niin, tuna trainees te hian midangte hnenah zirtirna an la pe chhawng ve leh dawn a ni. Dr.Rao ho hian Department pahnih ṭangkawp te hian training module duang turin ruahmanna  an siam mek a. Training module hi siam zawh anih hunah tlawmngai pawl hrang hrang te leh a huapzau zawka ngawlveite enkawlna hi inzirtirna neih a ni ang.

Vawiin training  programme hawnna inkhawmah hian Dr. S. Mara Thansiami,Mission Director, National AYUSH Mission & Dy. Director, Directorate of AYUSH chuan welcome Speech hmangin kalkhawm te lo lawmin, Dr. Lalkhawngaihi Renthlei, Assistant Director, Directorate of AYUSH & Chief Executive Officer, State Medicinal Plants Board Mizoram, Directorate of AYUSH chuan Vote of thanks hmangin hawnna programme hi a khar ta a ni.