3463/2024-2025

Dated Lawngtlai, 10th December 2024 : Vawiin chawhnu dar 1:00 khan District Hub for Empowerment of Women, District Programme Office, Women & Child Development Department bul tumin LADC Hall, Lawngtlaiah hmeichhiate chunga hleilenna thleng ṭhin tibo tura ni 16 chhung beihpui thlak "16 Days Campaign on Elimination of Gender Based Violence" kharna hun leh 'Poster Making Competition' result puanna (Felicitation) hun hman a ni a. Pu Zoramsiama Hmar, Addl.Deputy Commissioner, Lawngtlai chuan Khuallian niin hun a hmanpui.

Pu Zoramsiama Hmar chuan chhungkua, hnathawhna hmun leh khawtlanga hmeichhiate chunga hleilenna, kut thlak bakah an khawsak leh an nun tinuam lo thei khawpa rilru naa siam a nih hian an mahniah nghawng a nei nasa thei em em a, chu chuan inkiltawihna leh mahni nunna lak duhna hial te a thlen theih avangin fimkhur a ṭul hle a ti a. A tlangpuiin a tuartu hmeichhia niin a titu chu mipa an ni thin a, hei hi thil veiawm tak leh sim ngai tak a ni, a ti. Human Rights hnuaiah mipa leh hmeichhia an in tluk tlang vek tih tarlangin Addl. DC chuan he intluktlanna hi zah a tul tiin, a bik takin mipate chu rilru siamthar turin a chah a. Vawiin programme hmanna chu a bul tan nan a hmang tur leh Sawrkar department hrang hrang leh NGO- te pawh hmeichhiate hmakhua ngai thar a, anmahni venhim kawnga theihtawp chhuah zel turin a sawm a. Hmeichhiate venhimna lam inzirtir uar zel a pawimawh tak zet tih sawiin, Pu Zoramsiama Hmar chuan hmeichhiate laka hleilenna ti reh tura rahbi thar kai tur leh hmalam huna thahnem ngai taka thawk zel turin kalkhawmte leh Lawngtlai mipuite a sawm nghal bawk.

Pu Z. Laldinhuala, SFL-DHEW, DPO, Women & Child Development Office, Lawngtlai chuan 'Elimination of Gender Based Violence Campaign' hman a nih chhan leh hemi puala activity hrang hrang buatsaih dan a sawi fiah a. Pu Zoramsiama Hmar chuan 'Poster making competition' lawmman dawngtute hnenah lawmman hlanna a nei nghal a ni.

Lawmman dawngtute chu:-
1. District Hospital, Lawngtlai - Labour Room Department (₹7,000/-)
2. CDPO, Chawngte, ICDS Project. (₹ 5,000/-)
3. District Education Officer, Lawngtlai (₹ 3,000/-)

Consolation Prize:
1.District industries Center, Lawngtlai (₹ 1,000 )
2. Deputy Commissioner Office, Lawngtlai (₹ 1,000 )

Pu Jerry Zirnunmawia, Block Mission Manager, MZSRLM chuan thu tawi sawina neiin, MZSRLM leh DHEW te thawho theihna tur leh an hmalakna hrang hrang a tarlang bawk.

Vawiin hun hmanna hi Pu V. Vanlaldingliana, Assistant D.P.O, Women & Child Development Office, Lawngtlai chuan kaihruaiin, Observation Home, Lai Women Association,OSC,Shakti Sadan,Oasis Boys Home, DIPRO ten an telpui thei a. Pi F. Lalengvari, DMC-DHEW, D.P.O, Women & Child Development Office, Lawngtlai chuan lawm thu sawiin hun a khar.