3462/2024-2025

Aizawl the 10th December, 2024 : Vawiin December Ni 10, 2024 khan Sports & Youth Services Department leh Mizoram Science, Technology & Innovation Council (MISTIC) buatsaihin Mizoram Science Mela 2024 khuhhawnna chu Innovation Facility Centre, MINECO-ah neih a ni. He hun hi Pu H. Lalhmingthanga, Director, Sports & Youth Services Department-in a kaihhruai a. Pu Lalnghinglova Hmar, Hon’ble Minister, Department of Sports & Youth Services chu Khuallian a ni a. Pu Lalramsanga Sailo, Secretary, Department of Sports & Youth Services chu Khualzahawm niin he hun hi an hmanpui.

Science Mela hi 28^th National Youth Festival puala programme ruahman niin, Ministry of Youth Affairs & Sports leh Ministry of Science & Technology-te tangkawpin he hun hi India state tinah a buatsaih a. Thupui “Innovation in Science & Technology” tih hmangin he hunah hian kum 15-29 inkar ten science lam kaihhawiha an thil siamchhuah te an pho chhuak a, inelna neih nghal a ni.

He programme-a Khuallian, Minister Pu Lalnghinglova Hmar chuan heng hun an thleng hi lawmawm a tih thu a sawi a. Mizo tena Science kan ngaih pawimawh thar a tul thu sawiin science chu subject harsa leh danglam bik ni lovin, taima tak leh thahnemngai taka zir chi a nih thu sawiin zirlaite a fuih a. Zirlai leh thalai kalkhawmte chu thil siamchhuah hmang tu ringawt ni lova a siamchhuaktu zinga tel ve tura hma la turin a chah bawk. Tunlai thiamna chi hrang hrangte chu internet kal tlanga kan ban phak maia a awm thu sawiin tangkai taka hman tum turin a chah a. Mizoram Science Mela atang hian rilru thar pu a, science thlir dan thar neia zir turin zirlaite a fuih bawk.

Khualzahawm Pu Lalramsanga Sailo pawhin thusawina hun neiin tangkai taka Mizoram Science Mela hmang turin a chah a. Central leh State sorkar chuan innovation a ngaih pawimawh hle thu sawiin kan ramah pawh mahni irawm chhuak hmanga ei zawng an tam tawh thu a sawi a. Tun mela a ti thate chu National level ah an tel leh dawn thu sawiin he programme hian rah tha tak a chhuah ngei a beisei thu a sawi bawk.

Mizoram Science Mela 2024 report tawi Dr. Davy Lalruatliana, General Secretary, Mizoram Science Mela Organizing Committee hnen atangin ngaihthlak a ni a, Mizoram Science Mela inbuatsaih dan leh hman a nih dan tur tlangpui a sawi a. District hrang hrang atangin mi sawmhnih panga (25) ten he hunah hian inelna an nei a, he Science Mela hi ni hnih (2) awh tur niin a ti thazual te hian Mizoram aiawhin 28^th National Youth Festival, January Ni 12-26, 2025, New Delhi-ah an thil siamchhuahte an pho chhuah leh tur thu a sawi.

Mizoram Science Mela hi department hrang hrang atanga official-te, school naupang leh science lam tui mite’n an chhim a ni.