Nimin khan Govt Region HSS-ah MLA Inthlanpui 2018-a Lawngtlai District-a 2nd & 3rd Polling Officer turte tan training hnuhnung ber buatsaih a ni a. Postal ballot hmanga vote thlakna facilitation centre hawn nghal a ni.

He training-ah hian 2nd & 3rd PO tura ruatte an kal tha hle a. District Level Master Trainer-te - Pi Carolyn LB Khiangte MCS, Pu Lalneihthanga Colney MCS, Pu Vabeimozachhi Chozah MCS, Pi Christina Lalmuanzuali MCS leh Pu Timothy R. Lalhmangaiha MCS te'n training hi an pe a. Chawhnu lamah postal ballot hmanga vote thlakna facilitation centre hawn niin, polling official turte hian postal ballot vote an thlak nghal a ni.

Nimina postal ballot vote thlakah hian 36-Tuichawng (ST) Assembly Constituency-ah vote 33, 37-Lawngtlai West (ST) Assembly Constituency-ah vote 152, 38-Lawngtlai East (ST) Assembly Constituency-ah vote 212 leh district pawn constituency dangah vote 32, a zavaiin vote 429 a tla a. November ni 19 & 20-a postal ballot vote tlate nen belh khawmin, tun thleng hian 36-Tuichawng bialah postal ballot vote 132, 37-Lawngtlai West bialah vote 263, 38-Lawngtlai East bialah vote 423, district pawn constituency dangah vote 146, a zavaiin postal ballot vote 964 a tla tawh a ni.

Election-a duty turte hian Form-12 hmangin postal ballot hmanga vote thlak dilna theh lutin, hemi hmang hian postal ballot siam a ni a. Lawngtlai DEO office-in postal ballot vote dilna an dawn atanga postal ballot siamsak, vote la thlak si lo hi Tuichawng bialah mi 21, Lawngtlai West bialah mi 28, Lawngtlai East bialah mi 60, constituency dangah mi 47, an vaiin mi 156 an la awm a. Postal ballot vote hi la thlak theih zel niin, RO office-ah bawm hun a ni ang a, post hmanga thawn theih a ni bawk ang. Election duty avanga a nia vote thlak hman lo turte chuan Form-12 hmangin postal ballot vote thlak dilna hi la theh luh zel theih a ni.