MLA Inthlanpui 2018-a Lawngtlai District-a Electronic Voting Machine (EVM) hman turte chu November ni 20 & 21 khan a dahna hmun Govt Lawngtlai College-ah commission fel a ni.

EVM commission-naah hian polling station tina EVM (control unit + ballot unit) leh Voter Verifiable Paper Audit Trail (VVPAT) hman tur thliar fel (randomise) tawh sa chu EVM engineer-te'n hman theih turin an buatsaih a. A khawl lam buatsaih fel vek a nih hnuah candidate-te hming chhut luh niin, a kal dik leh dik loh enfiah leh vek phawt a ni a. Vote thlak nana hman theih mai tura peih felfai a nih hnuah khawih danglam theih tawh loh tura seal hmanga uluk taka char niin, dah that nghal zel a ni.

EVM commission-naah hian General Observer, Police Observer leh Returning Officer-te bakah, political party ai awhte pawh an tel a. EVM-te hi a dik ngei a ni tih finfiah nan vote thlak chhin zel a ni.

Tun inthlan atan hian 36-Tuichawng (ST) Assembly Constituency-ah EVM 59, 37-Lawngtlai West (ST) Assembly Constituency-ah EVM 68 leh 38-Lawngtlai East Assembly Constituency-ah EVM 34 hman a ni dawn a. Commission hnu hi inthlan dawna a hmanna tur polling station-a phurh darh mai turin strong room-ah dah that a ni.