1238/2023-2024

2023 Vawkhniahzawn thla ni 24: Mizoram State Legislative Assembly Inthlanpui 2023 neih tura hman tur electoral roll siam thar tura 2nd Special Summary Revision kalpui tur chungchangah vawiin khan Lawngtlai District-a political party hrang hrang, tlawmngai pawl, kohhran hruaitute leh chanchinbu mite chu Deputy District Election Officer Pu Abraham Beirazi Khithie hovin a office chamber-ah an ṭhu khawm.

Pu Abraham Beirazi Khithie chuan inthlanna felfai leh thianghlim a awm theih nan electoral roll dik leh rin tlak neih a pawimawh tih sawiin, electoral roll thar siam turah thun luh ngai, paih ngai leh siam ṭhat ngaite tan kumin August ni 2 aṭangin theh luhna hun hawn a ni dawn a, hetah hian political party, tlawmngai pawl leh kohhran te'n ṭhahnem ngai taka hmalakna an kalpui chuan electoral roll dik leh rin tlak neihna atan kawngro a su hle dawn a ni, a ti a. Party, pawl leh kohhran ai awh kal khawmte chu theih tawp chhuaha thawhpui turin a sawm nghal a ni.

Election Officer Pu Denny Lalchhuanawma chuan Booth Level Agent-te nihphung leh an tih turte sawifiahin, Booth Level Agent-te chu BLO-te puitu ṭangkai tak an nih rualin, electoral roll a thun leh paih chungchangah pawh an ṭangkai hle dawn a ni, a ti a. Booth Level Agent-te chu political party-te'n vote an neihna polling station huam chhunga mi ngei an ruat a ngaih thu a sawi.

MLA Inthlanpui 2023 atana lectoral roll siam thar turah hian thun, paih leh siam ṭhat ngaite tihfel nan 2nd Special Summary Revision chu August thla chhung hian kalpui a ni dawn a. Electoral roll thar chu October ni 4, 2023-ah tlangzarh tura ruahman a ni.

He hunah hian kal khawmte chuan hriat thiam loh an neihte zawt fiahin, hmalakna atana ṭul nia an hriatte an sawi a. Lawngtlai District-ah raltlan ṭhahnem tak an awm mek avangin electoral roll siam thar turah ṭum dang zawng aia fimkhur a ngaih thu pawh sawi lan a ni.