1358/2023-2025

2023 Thlazing ni 2: Mizoram Legislative Assembly Inthlanpui, 2023 atana 2nd special summary revision neih tura hman tur Lawngtlai District-a assembly bial pathuma draft electoral roll chu vawiin khan Lawngtlai District Election Officer (DEO), Lawngtlai Bawrhsap Pu H. Lalhmingthanga chuan Lawngtlai DC Conference Hall-ah a tlangzarh a. Draft electoral roll hi political party ai awhte hnenah a hlan nghal.

DEO Pu H. Lalhmingthanga chuan draft electoral roll felfai tak a hun taka tihchhuah a nih theih nana thawktu, EO leh ERO/AERO leh Election Branch chungah lawm thu a sawi a. Kumin kum tawp lama MLA Inthlanpui buatsaih a nih dawn avangin tun ṭum special summary revision hi a pawimawh hle a ni tiin, electoral roll dik, felfai leh thianghlim a awm theih nan political party leh tlawmngai pawl te chu theih tawp chhuahpui turin a sawm a. Election Commission of India (ECI)-in India khua leh tui kum 18 tling chinte'n vote an neih vek chu a duh dan a nih angin kum 18 tling tharte electoral roll-a inziah luh thar bakah, vote nei tawhte pawh electoral roll-a kan chuan leh chuan loh inenfiah te, roll-a kan chuan dan a dik leh dik loh enfiah a, a dik lo lai siam ṭhat te chu August thla chhung hun hawnah hian chin fel tum turin District mipuite chu a chah a. Inthlan chu mipui ta a nih angin mi tin ṭan ho a ngai a ni tiin, electoral roll dik leh felfai a awm theih nan District mipuite thawhpuina a ngen a ni.

He hunah hian Electoral Registration Officer (ERO) leh Assistant ERO te, official-te leh political party ai awh leh tlawmngai pawl ai awhte an tel a. Election Officer Pu Denny Lalchhuanawma'n draft electoral roll dinhmun tlangpui a tar lan bakah, electoral roll dik leh felfai a awm theih nana ngaih pawimawh hrang hrangte sawi ho a ni bawk.

Draft electoral roll tlangzarh tak aṭanga a lan danin, 36-Tuichawng (ST) Assembly Constituency (A/C)-ah vote nei mipa 18,008 leh hmeichhia 17,364, an vaiin mi 35,372 an awm a; 37-Lawngtlai West (ST) A/C bialah vote nei mipa 14,489 leh hmeichhia 14,336, an vaiin mi 28,825 an awm a; 38-Lawngtlai East (ST) A/C bialah voter mipa 12,349 leh hmeichhia 13,203, an vaiin mi 25,552 an awm a; assembly bial pathumah hian vote nei mipa 44,846 leh hmeichhia 44,903, an vaiin mi 89,749 an awm a ni.

Kumin January ni 13-a tlangzarh final electoral roll, 2023 nena khaikhinin 36-Tuichawng bialah voter 74-in an pung a, 37-Lawngtlai West bialah voter 124-a pungin, 38-Lawngtlai East bialah voter 130-in an pung bawk a; bial pathumah hian a pum puiah voter 328-a pungin, a punna hi 0.37% a ni.

Vawiinah hian service voter roll pawh tlangzarh nghal niin, 36-Tuichawng aṭanga sipaia ṭang service voter 150 an awm a. 37-Lawngtlai West-ah service voter 47 awmin, 38-Lawngtlai East-ah service voter 35 an awm bawk a, Lawngtlai District pum puiah service voter 232 an awm a ni. Lawngtlai District aṭanga sipaia ṭangte chu an chhungte'n service voter roll-a an chuan leh chuan loh enfiahsak a, an lo chuang lo a nih chuan August thla chhung hian service voter roll-a an chuan theih nana hma laksak turin Election official-te chuan District mipuite an chah a ni.

Tun ṭuma 2nd special summary revision neih turah hian India khua leh tui kum 18 tling chin, October ni 1, 2005 leh a hma lama piang electoral roll-a inziah luh thar, paih, insawn leh siam ṭhat duhte tan August ni 31, 2023 thleng hun hawn a ni a. October ni 4, 2023-ah final electoral roll chu tar chhuah tura ruahman a ni.