Vawiin khan Lawngtlai DC Conference Hall-ah Election Expenditure Observer Pu Pema Tshering Bhutia IRS hovin Lawngtlai District chhunga assembly constituency pathuma MLA candidate-te'n campaign sensova an sum hman (expenditure) endik niin, expenditure monitoring team chhinchhiah dan nen enmil a ni.

Expenditure inspection hi November ni 20 leh ni 23-ah te khan neih tawh niin, tun hi a tum thumna a ni a. Vawiina inspection neihah hian Asst Expenditure Observer pathumte leh accounting team member-te telin, Lawngtlai District chhunga constituency pathuma candidate-te tana Additional Agent for Expenditure-te'n an account bu an ken khawm chu accounting team-te'n shadow observation register an vawnte nen enmil a, khaikhin a ni a. Sum hman dana thil fel lo leh rinhlelhawm hmuh a ni lo va, candidate zingah an sum hman theih zat Rs nuai 20 hmang tling an la awm lo bawk.

Vawiin tlai dar 4 hian campaign theih hun a tawp dawn nachungin, candidate-te expenditure hi la danglam thei a ni a. Vote thlak ni-ah reconciliation neih leh a ni ang.