Mizoram Chief Electoral Officer Pu Ashish Kundra, IAS chuan vawiin khan CEO Conference Hall-ah state chhung leh pawnlam chanchinthar lakhawmtute kokhawmin naktip maia Mizoram inthlan tur atan engkim peihfel thawhkhat tawh a ni tih a sawi.

CEO Pu Ashish Kundra chuan vawiin tlaiah Candidate-te campaign hun a tawp tawh dawn tih sawiin district 8-a DEO leh SP te nen an inbiak reng thu leh inthlan niah mipuite vote thlak dan tura ruahmanna leh venhimna lam (police security) pawh district tinah a tha tawk vek a ni a ti. Tun dinhmunah Mizoram State Inthlan turah hian Assembly Constituency 40 chuh turin Candidate 209 an awm thu te, service voter 4363 an awm thu te, electoral roll-ah inziak lutzawng zawng chu an zavaiin mi nuai 7.7 an ni a, chung zingah Mipa-nuai 3.75, Hmeichhia-nuai 3.94 leh pianphunga rualbanlo (PwDs) mi-3915 an awm bawk tih a sawi a. CEO chuan hmeichhiate chauh vote thlakna tur polling station siam a ni dawn a, Mizoramah chuan hmeichhiate vote thlakna tur pollling station bikte chu ‘Dingdi’ tih an phuah tih a sawi a, vawiinah mitdel leh mit lama harsatna neite tan Braille Epic sem vek a ni bawk a ti. Vote thlak ni-ah polling station thalchhuah 40 atangin ‘webcasting’ tih a ni dawn a; service voter-te chu electronic EVM hman tir vek an nih thu a sawi a. Nimin Pathianni khan Tripura Camp-a Bru awmten vote an thlakna tur hmun Kanhmun a tlawh leh thu sawiin engkim peihfel vek a ni tawh a, Bru Voter zat chu an vaiin mi 12,026 an ni a, Hachhek Constituency-ah Bru voter an tam ber a; Tripura leh Mizoram border thlengin Tripura sorkarin motor an ruahman sak vek ang a, Mizoram sorkarin a senso a tum thung dawn a ni a ti.

CEO Pu Kundra chuan Mizoram inthlan turah Mizo mipuiten sorkar hmalakna zawng zawng theihtawpin an lo thlawp zel a, a bik takin tlawmngai pawlte leh kohhran lamin inthlan muanawm leh felfai tak neih a nih theih nan theihtawp a chhuahpuina chungah lawmthu a sawi a. Inthlan ni November ni 28 (Nilaini)-ah chuan Mizo mipuite chu ‘hnam hnatlang’ nei leh tura sawmin, vote nei apiang chuan India khua leh tui tha an nihna angin vote thlak theuh turin a sawm a ni.