Vawiin khan Lawngtlai DC Conference Hall-ah District Election Officer Pu N. Chakhai MCS hovin Lawngtlai District chhunga constituency pathuma MLA inthlan buatsaih tura pianphunga rualbanlo (persons with disability - PwD)-te tana awlsamna tur ruahmanna siam chungchang sawi ho a ni.

He hunah hian DEO, 37-Lawngtlai West (ST) Assembly Constituency-a RO ni bawk Pu N. Chakhai bakah hian 38-Lawngtlai East (ST) AC-a RO Dr Andrew H. Vanlaldika MCS, 36-Tuichawng (ST) AC-a RO Pu R. Lalremsanga MCS leh Nodal Officer for PwD Pi Christina Lalmuanzuali MCS te pawh an tel a. Political party leh tlawmngai pawl hrang hrang ai awhte nen PwD-te tana ruahmanna chungchang hi sawi ho a ni.

MLA Inthlanpui 2018 lo awm turah hian mahnia vote thlak harsatte tan ruahmanna hrang hrang siam a ni a. Mahnia kal thei lo, wheelchair-a nawr ngaite tan an mamawh tur wheelchair leh a nawrna kawng tur ramp ruahman a ni a, mitdelte tan braille hawrawp hmanga vote thlak theihna ruahmansak an ni a; he'ng harsatna neite hi a tul a nih chuan polling official-te lirthei hmanga hruai leh thlah tura ruahman a ni bawk.

Lawngtlai District chhunga constituency pathumah hian BLO-te hnena in-report PwD mi 131 an awm a. Polling station 161 awmah wheelchair mamawhna tur polling station 27 awmin, wheelchair 27 hi lei fel tawh a ni a. Ramp mamawh pawh siam zawh tawh niin, PwD-te buaipui tur hian CYLA leh CYCA-te beisei an ni a, anni hian tlawmngaiin an lo buaipui dawn a ni. Mitdel leh rilru lama harsatna nei polling booth-a luhpui ngai an awm chuan mi pakhatin luhpui phal a ni, tih sawi lan a ni bawk.

Lawngtlai District chhunga PwD-te tan sum seng lova an duh ang an zawh fiah theihna tur dedicated toll-free helpline siam a ni a. 03835-232230-ah hian an tana ruahmanna siam chungchang leh an hriat duhte an zawt fiah thei dawn a ni.