Vawiin khan Lawngtlai District Health Department hnuaia Rashtriya Kishor Swasthya Karyakram (RKSK) huaihawtin Lawngtlai CMO Conference Hall-ah tleirawlte pualin "Adolescent Health Day" hman a ni.
He hun hmanpuitu RKSK District Nodal Officer Dr S. Thaizi chuan hun hman chhan a sawi fiah a. RKSK chu National Health Mission hnuaia programe pakhat, tleirawl kum 10-19 inkarte hriselna atana hma lakna a nih thu sawiin, tleirawlte'n an taksa ṭhan chhohnaah te, zuk leh hmuam leh ruihhlo lamah te, rilru lamah te harsatna an tawh loh nana hma lakna a nih thu a sawi a. Taksa leh rilru hriselna kaihhnawiha harsatna tawk mek tleirawlte ṭanpui chu an thil tum ber a nih thu a sawi.
He hunah hian RKSK District Co-Ordinator Pi Lalduhawmi Tlau chuan RKSK hnuaia an hma lak dan a sawi fiah a. National Tobacco Control Programme (NTCP) aṭangin zuk leh hmuam ṭhat lohzia inzirtirna, Mental Health Programme aṭangin tleirawlte zinga rilru hriselna dinhmun, Counsellor Pi PC Lalmuankimi hnen aṭangin tleirawl taksa ṭhan chhoh dan, chaw ṭha ei pawimawhzia leh tleirawl laia nau paiin hriselna a nghawng pawi dan te ngaihthlak a ni.
Chawhnu lamah tleirawl kal khawmte chu an hriselna endiksak an ni a. An san zawng leh rih zawng a inbuk tawk em tih endiksak niin, Hb test neihsak vek an ni a. CMO Conference Hall kawtah infiamna neihpui an ni bawk.
