Vawiin khan Lok Sabha Inthlanpui 2019-a Lunglei, Lawngtlai leh Siaha District tana General Observer Pu Krishna Kumar, IAS leh Police Observer Pu Sachin Ashok Patil, IPS te chuan Lawngtlai tlawhin, inthlan inbuatsaihna hrang hrang an enpui.

Observer-te hi Lawngtlai District Election Officer (DEO) Pi Shashanka Ala, IAS leh Superintendent of Police (SP) Pu Amit Goel, IPS te hovin election official, nodal officer leh political party ai awhte'n lo dawngsawngin, DC office chamber-ah inkawm khawmna hun hman a ni a. Lok Sabha Inthlanpui 2019 hmachhawn tura Lawngtlai District chhunga inpuahchahna kalpui dante hrilhfiah niin, inthlan kaihhnawih boruak hrang hrang sawi ho a ni a. Govt Lawngtlai College-a EVM dah ṭhatna strong room leh vote chhiarna hmun turte pawh enpui an ni bawk a. Observer-te chuan Inthlanpui hmachhawn tura Lawngtlai District inpuahchahna chu ṭha tawk leh lungawithlak viauva an hriat thu an sawi.