Vawiin hian Lok Sabha Election, 2019 atana Election Commission of India in Serchhip, Champhai, Mamit leh Kolasib District te tana Expenditure Observer atana a ruat Pu H. Lallien Songate, IRS chuan Serchhip a tlawh a. Lok Sabha inthlanna buaipui meka Expenditure Monitoring Team hrang hrang te hnathawh dan a enpui.

District Electoral Officer Pi Sangchhin Chinzah, Addl DEO Pu Chuauhnuna, Expenditure Monitoring Nodal Officer Pu R. Vanrengpuia, Election Officer Pu Vanlalhmachhuana, Media Nodal Officer Pu K. Saitluanga te nen DEO pisaah inkawmna neiin Lok Sabha Election inbuatsaihna kal meka Expenditure Monitoring kalpui dan tlangpui te an sawi hova.  Vawiin thlenga report awm tawhte pawh an thlir ho nghal a ni. He mi hnu hian Pu H. Lallien Songate hian Expenditure Monitoring Team hrang hrangte chu an thuthmun ah a tlawh kual zui leh a ni.

Expenditure Observer hian Serchhip District MCMC & Media Centre pawh tlawh nghalin Media Nodal Officer leh MCMC Secretary Pu K. Saitluanga’n Media lama Serchhip District dinhmun te, MCMC hnathawh dan te report a pe a. Chumi hnuah Asst. Commissioner of Excise and Narcotics Office tlawh lehin hetah hian Pu R. Laldinsanga, Asst. Commissioner chuan report pein an hnathawh dan hrilhfiahna a nei leh bawk a ni.

Pu H. Lallien Songate chuan, kei hi in hnathawh dan that leh that loh endik tura lokal ka nilova, inthlanna felfai leh thianghlim a awm theih nana nangmahni tanpuitu tur, harsatna emaw hriatthiam tawk loh in neih palha tanpui tur che u a lokal zawk ka ni. Expenditure Monitoring lamah harsatna in nei a nih chuan engtiklai pawhin biak theih reng ka ni tih min hriat sak dawn nia, tiin Serchhip District chhunga Lok Sabha inthlanna buaipuitute hi a chah a ni.