Chief Electoral Officer's Office, Mizoram leh Young Voters' Club tangkawp buatsaihin zirtawpni (March ni 29, 2019) khan Govt. Hrangbana College ah Lok Sabha inthlanpui 2019 lo awm tura thalai tam zawk ten vote an thlak a, mipui aiawh thlanna a an tel a pawimawhzia inhrilhhriatna hun Young Voters' Fest hman a ni.

Young Voters' Fest ah hian khuallian Pu Ashish Kundra, IAS, CEO chuan kalkhawm thalai te hnenah vote thlak pawimawhna leh ram leh hnam hmasawnna atana vote thlak tura thalaite mawhphurhna san zia te sawiin, mahni chhia leh tha hriatna diktak hman a pawimawhzia a sawi a, April ni 11, 2019 a Lok Sabha inthlanpui atana vote thlak huna tel vek turin a sawm bawk a ni.

Pu H.Lianzela, MCS, Jt.CEO chuan kalkhawm thalaite hnenah thu sawiin, vote thlak tura pen chhuah a tul zia a sawi a. Mizoramah hian Lok Sabha inthlanah vote tla a tlem thin avangin thalai te chu tang sauh sauh turin a fuih bawk a, vote hlu tak hmangin thalai ten kan ram inthlanpuiah hian "aw" an neih theih bakah vote thlak hi an chanvo anih thu a sawi  bawk a ni. Pu Andrew H.Lalremruata, MIS, Nodal Officer pawhin thu sawiin thalai te tana Young Voters Fest huaihawt anih thu a tarlang a, lawmthu sawina hun Pu Malsawmzuala, MCS, Asst CEO in a hmang bawk a ni.

Young Voters' Fest ah hian Aizawl chhunga College hrang hrang te an tel a, an tana election chungchang inhrilhhriatna ni pah fawmin inelna hrang hrang- Painting, Slogan Writing, Public Speaking, Poetry Writing, Mobile Photograhy Competition, Quiz leh Beat Contest te huaihawt a ni a, Signature Campaign neih ani bawk.