No.2343/2020-2020

Lawngtlai, Nikir thla ni 23, 2020: Vawiin khan Agriculture Department, Lawngtlai District chuan Sub-Mission on Agriculture Mechanisation (SMAM) 2019-2020 hnuai atangin kut hna thawktute tan lei lehna khawl (power tiller) an sem chhuak.

Khawl sem chhuahna hun hi District Agriculture Office kawtah buatsaih niin, DAO Pu J. Rokima'n a kaihruai a. AEO Pu H. Lalbiaknia'n technical report pein, kut hna thawktu (beneficiary)-te hnen atangin thu sawi ngaihthlak a ni a. AEO Pi Vanlalngaii'n lawm thu a sawi hnuah DAO Pu J. Rokima'n beneficiary-te kutah chabi hlanin, an khawl sem chhuah takte hi a vai liam nghal a ni.

Vawiina lei lehna khawl an sem hi power tiller panga (5) leh mini-power tiller pali (4) a ni a. He'ng khawl leina tur hi beneficiary-te'n SMAM atang hian subsidy an hmu a. Power tiller pakhatah Agriculture Department chuan subsidy Rs 85,000/- zel a tumsak a, mini-power tiller pakhatah a man chanve zel a tumsak bawk.

SMAM hi kum 2015 atang khan Lawngtlai District-ah kalpui ve tan niin, kut hna thawktute buh bal thar chhuah a pun theih nana khawl tha chakna hmang tangkai tura hma lakna a ni a. Kut hna thawktute'n an khawl mamawh an hawh theihna tur 'Custom Hiring Centre' te buatsaih niin, power tiller mai bakah, tractor te, fu herna khawl te, hnim samna te, hlo kahna leh tui pump khawl te pawh subsidy-a pek chhuah thin a ni.