No.2342/2020-2020

Covid -19 hripui avanga state dang atanga Khawzawl District-a rawn haw khung hran mek te zingah test result negative chunga Khunghran hun hmang zo ten Quarantine Centre an chhuahsan mek zel a, state dang atanga rawn haw an la awm zeuh zeuh bawk.

Vawiin khan Quarantine Centre 2 leh Isolation Centre 1 atangin mipa 16 leh hmeichhia 24, an vaiin mi 40 an chhuak a. Chhuak turte thlahna huntawi Khawzawl Vengthar Presbyterian Kohhran hall-a neih chu Bawrhsap Pu H Lianzela'n a hmanpui a ni. Bawrhsap chuan chhuak turte chu covid 19 laka an fihlim tâk avang te, zalen deuh zawka mahni khaw lam-a an awm tawh dawn avangte in a lawmpui thu sawiin khunghran an nih chhunga an dinhmun te hrethiama kan him tlanna atana an thuawihna chu fakin thuawihna leh dawhtheihnate chu midangte lakah ching chhunzawm zel turin a chah a, khunghrante kawng hrang hrang-a buaipuitute zawng zawng chungah lawmthu a sawi nghal bawk ani. Inkhawm hi Pu R. Lalrintluanga, Principal, Govt. Khawzawl College leh Zonal Officer ni bawk in a kaihruaiin Presbyterian Kohhran Khawzawl Vengthar Bialtu Pastor F. Lalsangkunga'n hunserh a hmang a, Pi Rochuangkimi, Health Worker-in certificate a hlan bawk. Chhuak turte'n anmahni enkawl tute laka lawmthu sawina atana pawisa an thawhkhawm Rs.1,102.00 chu Vengthar VLTF-kutah an hlan bawk ani.

Hetih lai hian vawiin khan state dang atanga rawn haw mi 1 in Khawzawl a rawn thleng leh a. Tunah hian Khawzawl District-ah Quarantine Centre leh Isolation Centre-ah mi 59 an awm mek a, kawnga rawn thang mek an la awm bawk.

Khawzawl District chhungah hian mi 228 -te atangin swab sample 308 endik tawh ani a, heng zinga 80 chu endik nawn an ni. Chung zinga mi 227 - te result chu a chhuak tawh a, positive 2 awm mekin a hma a positive te zinga 1 chu a negative tawh a ni.

Mi thahnemngaite atangin Khawzawl DLTF chuan thilpek a dawn chhunzawm zel a. Tun hnaiah LAD Aiduzawl UPC(MIZORAM) in Rs. 2,000.00, Rabung Presbytetian Kohhran in Rs. 10,000.00, DK Enterprise & Khawzawl Times ten Hand sanitizer, hmai tuamna leh sodium hypochloride thahnem tak bakah Rabung VLTF ten antam, maian, bawkbawn, hmarcha, sawhthing, alu leh chawhmeh chihrang hrang tam tham tak an pe a ni.