No.4325/2021-2022

Aizawl Vau thla ni 18, 2022: Mizoram Journalists' Association (MJA)-in kum sawmnga a tlin (golden jubilee) chhinchhiah nâna MJA Lawngtlai District-in Lawngtlai Press Club-a lung an phun chu vawiin khân Lawngtlai East Bialtu MLA, Agriculture Development Board Vice Chairman Pu H. Biakzaua chuan a hawng.

Lungphun hawn zawha Lawngtlai Press Club-a hun hmanah Pu H. Biakzaua chuan District MJA member-te chu MJA Golden Jubilee chibai bûkin, duhsakna a hlân a. Sawrkar khalh ngîl leh mipuite hnêna thu ṭangkai theh darh kawngah chanchinbu mite an pawimawh hle tih sawiin, Mizoram sawrkar pawhin ngai pawimawhin, an tân MJA pension scheme a ruahman mêk a, rei lo têah hman theih a nih thuai a beiseiawm, a ti a. Lawngtlai District MJA hma lâkna leh hna thawh dân thlîrin lungawithlâk hlea a hriat thu sawiin, chanchinbu mite'n mipui rilru sûkthlêk kuai her tûra theihna an neih chu a ṭha zâwnga hman a pawimawh thu a sawi a, chumi kawngah chuan thu rin tlâk theh darh ṭhîn Lawngtlai District MJA member-te chu fakawm a tih thu a sawi.

Pu H. Biakzaua chuan MJA chu kum sawmnga tling tawh pâwl a nih angin member-te pawh puitling zia pu a, mi dang tâna entawn tlâk leh kawng dik kawhhmuhtu nih tum tûrin a chah a. Lawngtlai District MJA member-te chu thawh hona ṭha, inlungrualna leh inpumkhatna nên hma lam pan zêl tûrin duhsakna a hlân a ni. Pu H. Biakzaua hian March ni 23, 2022-a Aizawla MJA Golden Jubilee lawmna leh General Conference-a an kalna tûr sênso phuhrûk nân District MJA te hi ₹ 20,000/- (chêng sîng hnih) a hlân nghâl bawk.

MJA Golden Jubilee lungphun hawnna hun hi District MJA Treasurer Pu H. Lalrinmawia'n kaihruaiin, Lairam Higher Academy of Science (LAHAS) Principal Rev. C. Chanchinmawia'n hunserh a hmang a. District MJA President Pu Lalngheta Ralte chuan thu sawiin, Mizoram sawrkar leh Lai Autonomous District Council sawrkar te'n journalist-te an ngaih pawimawh ṭhinna leh inhawng taka an thawhpui ṭhinnaah lâwm thu a sawi a. Sâwm bîkte hnên aṭangin thu sawi leh zaithiam zai ngaihthlâk niin, District MJA Secretary Pu C. Zaṭhianga'n lâwm thu sawiin hun a khâr a ni.

Vawiina Lawngtlai District MJA te'n MJA Golden Jubilee lungphun hawnna hun an buatsaihah hian Khuallian Pu H. Biakzaua hi LADC-a Executive Member i/c LAD, etc. Pu C. Rongura, Town Committee Chairman Pu Sanghuliana Mualchin, MDC Pu T. Lalengmuana leh MDC Pu K. Hre Kung te leh MNF District Headquarters President leh hruaitu dangte'n an ṭawiawm a. Lawngtlai DIPRO Pu C. Lalhruaitluanga leh LADC I&PR Department ai awh Pu PC Chuaudinga te'n hun an hmanpui bawk.

MJA hi kum 1972 March ni 23 khân din niin, kumin hi an kum sawmngana, golden jubilee kum a ni a. MJA Golden Jubilee lawmna pual hian Lawngtlai District MJA chuan January ni 7, 2022 khân jubilee mei dêtin, January ni 28, 2022 khân annual conference an lo hmang tawh a. February ni 10, 2022 khân Lai Autonomous District Council (LADC)-a head of department-te tân leh February ni 24, 2022 khân state sawrkar hnuaia head of office-te tân media awareness programme buatsaih leh bawkin, vawiin March ni 18, 2022 khân Golden Jubilee lungphun an hawn bâkah, MJA Golden Jubilee pual hian Lairam Christian Medical Centre & Hospital (LCMC&H)-ah ṭanpuina ₹ 5,000/- (chêng sâng nga) an hlân bawk a ni.